شیعہ برادری کا امریکہ کے خلاف احتجاج

امریکہ کے فضائی حملے میں ایران کے کمانڈر جنرل قاسم سلیمانی اور ابو مہدی کے ہلاک ہونے کے بعد مختلف مقامات پر احتجاج کیا جا رہا ہے۔ اس سلسلے میں شیعہ برادری کے لوگوں نے دہلی کے منڈی ہاؤس سے جنتر منتر تک احتجاجی مارچ نکالا۔

شیعہ جامع مسجد کے امام مولانا محسن تقوی نے کہا کہ 'جنرل قاسم سلیمانی نے داعش کے خلاف جنگ لڑی تھی، اسے ایک شدت پسند حملے میں امریکہ نے شہید کر دیا، ہم یہاں ان کی شہادت پر اپنے غم اور غصے کا اظہار کرنے آئے ہیں'۔

مولانا جلال نقوی نے کہا کہ 'جنرل قاسم سلیمانی (جو عراق کے سرکاری دورے پر تھے) کو ایک فضائی حملے میں امریکہ نے شہید کر دیا، آج ہم یہاں منڈی ہاؤس سے جنتر منتر تک احتجاجی مارچ نکال رہے ہیں'، انہوں نے مزید کہا کہ 'ہم اقوام متحدہ سے مطالبہ کرتے ہیں کہ وہ امریکہ کو ایک دہشت گرد ملک قرار دیں'۔

ان کا کہنا تھا کہ 'ایک طرف وہ دہشت گردی کے خاتمے کی بات کرتا ہے، تو دوسری طرف وہ دہشت گردی کے خلاف جنگ لڑنے والوں کو مار رہا ہے'۔

مولانا جنان اصغر مولائی نے کہا کہ 'پوری دنیا کو معلوم ہے کہ عراق اور شام میں دہشت گرد تنظیم داعش کے خاتمے میں جنرل قاسم سلیمانی نے اہم کردار ادا کیاتھا'۔

'ایسا بہادر جنرل امریکی صدر ڈونلڈ ٹرمپ کے کہنے پر مارا گیا، جس سے یہ ظاہر ہوتا ہے کہ امریکہ کسی دہشت گرد کا مخالف نہیں ہے بلکہ اس کا حامی ہے'۔