بی جے پی کے رکن پارلیمان اور وزیر مملکت انوراگ ٹھاکر نے دہلی میں ایک انتخابی جلسہ عام سے خطاب کے دوران وہاں موجود نوجوانوں سے متنازع نعرے لگوائے تھے۔
انوراگ ٹھاکر نے اپنی تقریر کے دوران ملک کے الگ الگ حصوں میں شہریت ترمیمی قانون کے خلاف چل رہے مظاہرے پر نکتہ چینی کی اور اس کے بعد متنازع نعرے لگوائے۔
اپنے نعرے میں انہوں نے کہا 'دیش کے غداروں کو'، جس کے جواب میں وہاں موجود لوگوں نے کہا کہ ' گولی ماورو سالوں کو'۔
در اصل انوراگ ٹھاکر بی جے پی کے امیدوار منیش چودھری کے حق میں انتخابی تشہیر کرنے یہاں پہنچے تھے اس دوران انہوں نے کہا کہ 'دہلی کو محفوظ رکھنے کے لیے بی جے پی کو ووٹ دیجیے، اس کے بعد انہوں شاہین باغ میں چل رہے احتجاجی دھرنے کا ذکر کیا اور کہا کہ 'دہلی اسمبلی انتخابات میں یہ موقع ملا ہے کہ رٹھالا کے لوگ کیسی حکومت کا انتخاب کرنا چاہیں گے'۔
اس دوران انہوں نے شاہین باغ میں چل رہے احتجاجی دھرنے کو ٹکڑے ٹکڑے گینگ بتایا اور وہاں موجود بی جے پی کارکنان سے کہا کہ 'دہلی کے کسی بھی علاقے کو شاہین باغ نہیں بننے دیں'۔