چیف الیکشن کمیشر آف انڈیا سنیل اروڑا نے پریس کانفرنس میں دہلی میں منعقد ہونے والے اسمبلی انتخابات کی تاریخ کا اعلان کرتے ہوئے کہا کہ آئندہ ماہ کے آٹھ فروری کو دہلی میں انتخابات کے لیے ووٹنگ ہوگی اور نتائج 11 فروری کو ظاہر کیے جائیں گے۔
اس تعلق سے دہلی میں کل 13،750 پولنگ مراکز قائم کیے جائیں گے ، تاریخ کے اعلان کے ساتھ ہی دہلی میں ضابطہ اخلاق کا نفاذ ہوگیا ہے۔
الیکشن کمیشن کے جاری کردہ شیڈول کے مطابق دہلی میں سنہ 2020 تک کل ووٹروں کی تعداد 1،46،92،136 ہے۔
انتخابات کے تعلق سے مزید تفصیلات 14 جنوری کو جاری کیے جائیں گے اور 24 جنوری تک امیدواروں کے پرچۂ نامزدگی واپس لینے کی آخری تاریخ ہوگی۔
واضح رہے کہ اروند کیجریوال کی عام آدمی پارٹی اور مرکز میں بر سراقتدار جماعت بی جے پی میں راست مقابلہ ہے، حالانکہ اس وقت کانگریس کے بھی پہلے سے مضبوط پوزیشن میں ہونے کا امکان ظاہر کیا جارہا ہے۔
سنہ 2015 میں دہلی اسمبلی انتخابات میں عام آدمی پارٹی نے دہلی کی 70 میں سے 67 سیٹوں پر فتح حاصل کی تھی اور بی جے پی کو صرف تین سیٹوں پر کامیابی حاصل ہوئی تھی۔
دہلی الیکشن کمیشن کے افسر رنویر سنگھ نے تفصیلات بتاتے ہوئے کہا ہے کہ دہلی میں کل مرد ووٹروں کی تعداد 80،55،686 ہے جبکہ خواتین ووٹروں کی تعداد 66،35،635 ہے جبکہ خواجہ سرا ووٹروں کی کل تعداد 815 ہے اور وہیں این آر آئی ووٹروں کی تعداد 489 ہے۔
