دہلی تشدد پر لوک سبھا میں بدھ کو بحث ہوگی

حکمراں جماعت اور اپوزیشن کے درمیان پارلیمنٹ میں پورے ہفتے ٹکراؤ کا موضوع رہے 'دہلی میں تشدد' کے معاملے پر لوک سبھا میں بدھ کو بحث ہوگی۔ گزشتہ جمعہ کو اپوزیشن کے ہنگامے کی وجہ سے دونوں ایوانوں کی کارروائی بدھ تک ملتوی کر دی گئی تھی۔

کانگریس کے لوک سبھا میں رہنما ادھیر رنجن چودھری اس معاملے پر ضابطہ 193 کے تحت بحث کا آغاز کریں گے، جبکہ بینچ کی جانب سے نئی دہلی سیٹ سے رکن پارلیمنٹ میناکشی لیکھی پہلی مقرر ہوں گی حالانکہ راجیہ سبھا کے قانون سازی کے کام کاج کے ایجنڈے میں ابھی اس معاملے پر بحث کا ذکر نہیں کیا گیا ہے۔

دہلی میں تشدد کے معاملے پر بحث کی مانگ پر اپوزیشن نے بجٹ اجلاس کے دوسرے مرحلے میں دونوں ایوانوں میں اب تک ایک دن بھی ہموار طریقے سے کام کاج نہیں چلنے دیا اور ہنگامے کی وجہ سے کارروائی روز ملتوی کرنی پڑی۔ راجیہ سبھا میں کوئی کام کاج نہیں ہوسکا جبکہ لوک سبھا میں جو کچھ کام ہوا وہ ہنگامے کے دوران ہی ہوا۔

حکمراں جماعت کی جانب سے پہلے ہی واضح کر دیا تھا کہ اس معاملے پر ہولی کے بعد بحث کرائی جائے گی، جبکہ اپوزیشن تمام کام روک کر اس پر بحث کی مانگ پر اڑا تھا۔ بجٹ اجلاس کا دوسرا مرحلہ دو مارچ سے شروع ہوا تھا۔

سی اے اے اور این آر سي کے معاملے پر حالیہ احتجاجی مظاہروں کے دوران دارالحکومت دہلی میں تشدد کے واقعات میں تقریباً 50 لوگوں کی موت ہو گئی تھی۔