'امت شاہ خوفزدہ کرنے کی کوشش نہ کریں'

کمیونسٹ پارٹی آف انڈیا کے قومی سکریٹری اتل کمار انجان نے وزیر داخلہ امت شاہ کے دفعہ 370 اور 35  اے کی منسوخی کے خلاف آواز اٹھانے والوں کو جیل بھیجے جانے والے بیان پر چیلنج کیا ہے۔

ریاست اتر پردیش کے ضلع مئو میں سی پی آئی کے قومی سکریٹری اتل کمار انجان نے انتباہ دیاہے کہ وزیر داخلہ ہمیں خوفزدہ کرنے کی کوشش نہ کریں۔

انجان نے کہا کہ 'امت شاہ اپنا ماضی بھول رہے ہیں، جو خود تڑی پار رہے ہیں وہ کیا ہمیں جیل بھیجیں گے'۔ انہوں نے کہا کہ 'امت شاہ خود سپریم کورٹ سے سزا یافتہ ہیں، وہ چاہیں تو ملک کو سیاہ قانون کے تحت جیل بنا سکتے ہیں'۔

انجان نے مزید کہا کہ ملک میں غیر اعلانیہ ایمرجینسی نافذ ہے، آج بولنے کی آزادی سلب کی جارہی ہے، لوگوں کو ڈرایا دھمکایا جارہا ہے۔ لیکن ہم چپ نہیں بیٹھیں گے، اگر امت شاہ کو ہمت ہے تو ہمیں گرفتار کریں ڈرانے کا کام نہ کریں بھلے ہی ہمیں گولی ماردیں۔