چین : کورونا وائرس سے اب تک 3 ہزار 199 افراد ہلاک

چین میں خوفناک کورونا وائرس سے 10 مزید افراد کی موت کے بعد اس وبا سے مرنے والوں کی تعداد بڑھ کر 3199 ہو گئی ہے جبکہ 80 ہزار 844 افراد اس وائرس سے متاثر ہیں۔

چین کی قومی صحت کمیٹی نے کہاکہ' قومی صحت کمیٹی کو ملک کے 31 صوبوں سے ملنے والی اطلاعات کے مطابق اب تک تقریباً 80 ہزار844 افراد کے کورونا وائرس سے متاثر ہونے کی تصدیق کی گئی ہے اور گزشتہ دنوں تقریباً 1370 مریضوں کی صحت یابی کے بعد اسپتال سے چھٹی دی گئی ہے'۔

گزشتہ 24 گھنٹوں کے دوران چین میں کورونا وائرس سے 10 موت ہوئی ہے اور 20 نئے کیس سامنے آئے ہیں۔

قابل غور ہے کہ چین کے صوبہ ہبوئی کے دارالحکومت ووہان سے پھیلنے والے کورونا وائرس کی زد میں دنیا کے 135 سے زیادہ ملک آ گئے ہیں۔ عالمی ادارہ صحت (ڈبلیو ایچ او) نے کورونا وائرس کے بڑھتے ہوئے خطرے کے درمیان اسے عالمی وبا کا اعلان کیا ہے۔

عالمی ادارہ صحت نے بتایا کہ چین کے باہر كوروناوائرس کے کم از کم 9 ہزار 700 نئے کیسز درج کئے گئے ہیں۔ اس کے بعد اس وبا سے متاثرہ افراد کی تعداد بڑھ کر 61 ہزار ہو گئی ہے۔

ڈبلیو ایچ او نے ہفتہ کو جاری اپنے بیان میں کہا ہے کہ گزشتہ 24 گھنٹوں کے دوران چین سے باہر 135 ممالک میں 9751 نئے کیسز سامنے آئے ہیں۔ اس وبا سے متاثرہ افراد کی تعداد بڑھ کر 61 ہزار518 ہو گئی ہے۔ عالمی سطح پر یہ تعداد 1 لاکھ 42 ہزار بتائی جا رہی ہے۔

اس مدت کے دوران چین کے باہر 424 افراد کی موت ہونے سے یہ تعداد بڑھ کر 2 ہزار199 ہو گئی۔

ڈبلیو ایچ او نے چین میں کورونا سے 14 افراد کی موت اور وبا کے 18 نئے کیس درج کئے ہیں۔