لاک ڈاؤن کو 52 روز مکمل ہوچکے ہیں لیکن کورونا وبأ پو قابو پانے کے لیے نافذ کی گئی بندش کے دوران بھی ملک بھر میں اس وبا کا قہر جاری ہے یہی وجہ ہے کہ گزشتہ 24 گھنٹے کے دوران 3722 نئے کیسز کے ساتھ اس وبا سے متاثر ہونے والے افراد کی تعداد بڑھ کر 78،003 ہوگئی ہے۔
اس وبأ سے مرنے والوں کی تعداد 2،549 تک پہنچ چکی ہے جبکہ صحتیاب ہونے والے مریضوں کی تعداد 26،235 بتائی جارہی ہے۔ ملک بھر میں کورونا وائرس کے ایکٹیو کیسز کی تعداد 49،219 ہے۔
واضح رہے کہ گزشتہ 24 گھنٹوں میں 3722 نئے کیسز سامنے آئے ہیں جبکہ 124 مریضوں کی اموات ہونے کی تصدیق کی گئی ہے۔
اس وبأ سے سب سے زیادہ متاثر ریاست مہاراشٹر ہیں جہاں اس وبأ سے اب تک 25،922 افراد متاثر ہوئے ہیں، وہیں صحتیاب مریضوں کی تعداد 5،547 ہونے کے ساتھ ساتھ مرنے والے مریضوں کی تعداد 975 درج کی گئی ہے۔
اس کے بعد گجرات دوسرے نمبر پر ہے جہاں اب تک 9267 افراد متاثر ہوئے ہیں اور صحتیاب ہونے والوں کی تعداد 3562 ظاہر کی گئی ہے جبکہ 566 لوگوں کی موت واقع ہوئی ہے۔
دن بہ دن کورونا وائرس بھیانک شکل اختیار کرتا جارہا ہے حیران کن بات یہ ہےکہ ریاست تامل ناڈو میں یہ وبأ تیزی سے اپنے پاؤں پھیلارہی ہے یہاں گزشتہ چند دنوں میں سیکڑوں پازیٹیو کیسز سامنے آئے ہیں جس کے بعد ریاست میں کورونا متاثرین کی تعداد 9،227 تک پہنچ گئی ہے۔
اس کے علاوہ دارالحکومت دہلی بھی اس وبأ کی زد میں آچکا ہے، دہلی میں کورونا متاثرین کی تعداد 7998 تک پہنچ گئی ہے جبکہ مرنے والوں کی تعداد 106 بتائی جارہی ہے۔
