بہار: کانگریس کا انتخابی منشور، بجلی بل معاف کرنے کا وعدہ

بہار میں آئندہ ہفتے سے اسمبلی انتخابات شروع ہو رہے ہیں، انتخابات کو لے کر کانگریس نے اپنا انتخابی منشور آج جاری کر دیا، پارٹی نے اسے 'بہار بدلاؤ پتر' کا نام دیا ہے۔

کانگریس کے انتخابی منشور میں کسانوں سے وعدہ کیا ہے کہ وہ اقتدار میں آنے پر مفت بجلی اور کسانوں کا قرض معاف کرے گی، اس کے علاوہ کانگریس نے اپنے منشور میں تیجسوی یادو کو بھی جگہ دی ہے۔

پٹنہ میں میں واقع بہار کانگریس کے صدر دفتر صداقت آشرم میں منشور جاری کرتے ہوئے پارٹی کے رہنما رندیپ سنگھ سرجے والا نے کہا کہ جب کانگریس اقتدار میں آئے گی تو وہ کسانوں کا قرض سمیت بجلی کا بل بھی معاف کرے گی۔

اس کے علاوہ کسانوں کو فصل کی صحیح قیمت دلانے کے لیے کام کرے گی، انہوں نے کہا کہ پنجاب کی طرز پر مرکز کے قانون کو مسترد کردیا جائے گا۔

کانگریس کے قومی جنرل سکریٹری رندیپ سنگھ سرجے والا نے بتایا کہ 'ہم نے 24 ہزار کروڑ روپئے کا 'جل سے نل' اسکیم میں بدعنوانی دیکھی ہے، انہوں نے کہا کہ بہار میں 'رائٹ ٹو واٹر' (سردار ولبھ بھائی پٹیل پینے کے پانی کی اسکیم) ہوگی۔

بہار میں 'کے جی سے پی جی' تک بیٹیوں کی تعلیم مفت ہوگی، اس کے علاوہ راج ببر نے کہا کہ اگر کانگریس اقتدار میں آتی ہے تو وہ بے روزگاروں کو ملازمت ملنے تک ہر مہینے 1500 روپے دے گی، انہوں نے کہا کہ نئی حکومت کے پہلے کابینہ اجلاس میں 10 لاکھ نوکریاں دینے کا فیصلہ کیا جائے گا۔

اسی دوران کانگریس کے رہنما طارق انور نے کہا کہ آج بہار کے طلبا تعلیم کے لیے باہر جانے پر مجبور ہیں، وزیراعلیٰ نے ہاتھ جوڑ کر اور پٹنہ یونیورسٹی کو سنٹرل یونیورسٹی بنانے کی درخواست کی لیکن وزیر اعظم نے اس پر توجہ نہیں دی۔

طارق انور نے کہا کہ 'وزیر اعلی کی یہی حیثیت ہے وزیر اعظم کے سامنے، انہوں نے کہا کہ بارہویں کی جماعت 90 فیصد سے زائد نمبرات حاصل کرنے والی طالبات کو حکومت اسکوٹی دے گی۔