کاش! مودی جی 'بیان ویر' نہ ہوتے

کانگریس نے وزیراعظم نریندرمودی کے بیان ’بھارت میں سب کچھ ٹھیک ہے‘ پر انھیں  'بیان وِیر' قرار دیا اور کہا کہ کشمیریت کو زندہ رکھنے جیسے کئی سوال ملک کے سامنے موجود ہیں لہٰذا ان کا یہ بیان غیر مناسب ہے۔

مودی نے ہیوسٹن، امریکہ میں بھارتی کمیونٹی سے خطاب کرتے ہوئے کانگریس کے سینیئر رہنما پی چدمبرم کو نشانہ بناتےہوئے کہا تھا کہ بھارت میں بدعنوانی میں ملوث افراد کو جیل بھیج کر سزا دی جارہی ہے۔ انہوں نے زور دے کر دعویٰ کیا تھا کہ بھارت میں سب کچھ ٹھیک ہے۔

کانگریس نے آج مودی کے اسی بیان پر حملہ کرتے ہوئے کہا،’امریکہ میں جاکر بھارت میں سب کچھ ٹھیک ہونے کا دعویٰ کرنے سے پہلے وزیر اعظم ایک بار جموں و کشمیر کے درد کو محسوس کرلیتے۔ ایک بار کشمیریوں کو گلے لگالیتے،کشمیریت کو زندہ رکھنے کی کوشش کرتے تب شاید ان کا ’سب کچھ ٹھیک ہے‘کہنا مناسب ہوتا‘۔
کانگریس پارٹی نے انھیں ’بیان وِیر‘ قرار دیا اور کہا کہ مودی جو دعوے کررہے ہیں وہ حقیقت کے برعکس ہیں۔ پارٹی نے کہا ،’بیرون ممالک کی نگاہ میں بھارت ہمیشہ ماڈل ملک رہا ہے۔ ہم نے ہمیشہ دنیا کو راہ دکھائی ہے مگر آج ہمارے حصےمیں بھوک مری، پریس کو دبانے، خواتین کے عدم تحفظ جیسے چبھتے سوال ہیں۔ کاش مودی جی ’بیان وِیر‘ نہ ہوتے۔