کانگریس کے سابق صدر راہل گاندھی نے 'شدید سردی کے درمیان کسانوں کی تحریک' کی حمیات کرتے ہوئے مودی حکومت پر نکتہ چینی کی ہے۔
انہوں نے کہا کہ حکومت، شدید سردی کے باوجود احتجاج کرنے کے لئے مجبور کسانوں کی بات سننے کو تیار نہیں ہے، اس لئے اسے بتانا چاہئے کہ کسانوں کو ابھی کتنی قربانی دینی ہوگی۔
کانگریس کمیونکیشن ڈپارٹمنٹ کے سربراہ رندیپ سنگھ سرجے والا نے کہا کہ 'پچھلے 17 دنوں میں 11 کسان بھائیوں کی موت کے باوجود بے لگام مودی حکومت کا دل نہیں پسیج رہا۔ وہ اب بھی کسانوں کے ساتھ نہیں، اپنے صنعت کاروں کے ساتھ کیوں کھڑی ہے۔ ملک جاننا چاہتا ہے 'راج دھرم' بڑا ہے یا 'راج ہٹھ'۔'
انہوں نے کہا کہ 'جمہوریت میں بے لگامی کی کوئی جگہ نہیں۔ آپ اور آپ کے وزرا کی پالیسی ہر مخالف کو ماؤنوازی اور ملک سے غدار قرار دینے کی ہے۔ شدید سردی اور برسات میں جائز مطالبات کے لئے دھرنے پر بیٹھے کسانوں سے معافی مانگیں اور ان کے مطالبات فوری طور پر پورے کریں۔'
(یو این آئی)
