وائی ایس آرکانگریس اور جن سینا پارٹی کے کارکنوں میں تصادم

ریاست آندھراپردیش کے ضلع مشرقی گوداوری میں حکمراں جماعت وائی ایس آر کانگریس اور جن سینا پارٹی کے کارکنوں میں سنگباری اور لاٹھیوں سے حملہ کا واقعہ پیش آیا جس کے نتیجہ میں کاکناڈا میں کشیدگی دیکھی گئی۔

کاکناڈا کے رکن اسمبلی ڈی چندر شیکھر ریڈی کی جانب سے جن سینا کے صدر پون کلیان پر نامناسب کلمات کا استعمال کرنے پر ضلع کے بھانوگڑی سنٹر پر جن سینا کے کارکنوں نے احتجاج کیا۔

بعد ازاں یہ کارکن رکن اسمبلی کی قیام گاہ کے محاصرہ کے لئے روانہ ہوئے تاہم پولیس نے ان کو روک دیا۔
اسی دوران بعض کارکن، رکن اسمبلی کے مکان کے قریب پہنچ گئے جہاں ان کا سامنا وائی ایس آرکانگریس کے کارکنوں سے ہوگیا۔اس درمیان دونوں جماعتوں نے ایک دوسرے پر سنگباری کی اور لاٹھیوں سے حملہ کیا۔

اس علاقہ میں کشیدگی کی صورتحال کو دیکھتے ہوئے پولیس کی اسپیشل برانچ کو وہاں تعینات کردیاگیا۔وہیں جن سینا کے کارکنوں نے رکن اسمبلی کو گرفتار کرنے کامطالبہ کیا۔