مہلوکین کے اہل خانہ کو معاوضہ

'کنٹریکٹ ملازم کے خاندان کے رکن کو کنٹریکٹ پر ملازمت جبکہ مستقل ملازم کے خاندان کے کسی رکن کومستقل ملازمت فراہم کی جائے گی'۔

آندھراپردیش حکومت نے ایچ ایس ایل واقعہ کے سلسلے میں مرنے والے افراد کے اہل خانہ کے لئے معاوضہ کا اعلان کیا۔

ریاستی وزیر اونتی سرینواس نے وشاکھاپٹنم میں کہا کہ ہندوستان شپ یارڈ واقعہ کے مہلوکین کے خاندانوں کو فی کس 50لاکھ روپئے معاوضہ دیا جائے گا۔

مذکورہ وزیر نے عہدیداروں سے اس ضمن میں بات کی۔انہوں نے نشاندہی کی کہ مرنے والے کنٹریکٹ ملازم کے خاندان کے رکن کو کنٹریکٹ پر ملازمت فراہم کی جائے گی جبکہ مرنے والے مستقل ملازم کے خاندان کے کسی رکن کومستقل ملازمت فراہم کی جائے گی۔ساتھ ہی ان کو فوائد بھی پہنچائے جائیں گے۔

ہندوستان شپ یارڈ لمیٹیڈ میں گزشتہ روز یہ حادثہ پیش آیا تھا جس میں ایک بھاری کرین گر گیا تھا۔اس حادثہ میں 11افراد ہلاک ہوگئے تھے۔اس واقعہ کی محکمہ جاتی جانچ کے لئے کمیٹی قائم کی گئی تاکہ اس کی جانچ کی جاسکے۔

ملکاپورم پولیس نے اس سلسلہ میں ایک ایف آئی آر بھی درج کی۔ہفتہ کو کمپنی نے کہا تھا کہ کنٹریکٹر گرین فیلڈ اور دیگر ورکرز کی جانب سے اس کرین کی جانچ کی جارہی تھی۔