سماجی کارکن عبدالجبار کے انتقال پرکمال ناتھ کی تعزیت

مدھیہ پردیش کے وزیر اعلی کمل ناتھ نے بھوپال گیس متاثرین کے لئے پوری زندگی جدوجہد کرنے والے مسٹر عبدالجبار کے انتقال پر گہرے دکھ کا اظہار کیا ہے۔

انہوں نے کہا کہ مسٹر جبار کے انتقال سے ہم نے ایک جدوجہد کرنے والے اور اپنی زندگی سماجی خدمت کے لئے وقف کرنے والے کارکن کو کھو دیا ہے۔

مسٹر کمل ناتھ نے اپنے تعزیتی پیغام میں کہا کہ مسٹر جبار گیس متاثرین کو انصاف دلانے کے لئےمسلسل جدوجہد کرتے رہے۔

انہوں نے گیس متاثرین کے روزگار اور باز آباد کاری میں اہم کردار ادا کیا۔ وہ ماحولیات کے تئیں بھی کافی بیدار تھے اور وقتا فوقتا اس کی حفاظت کے لئے کام کرتے رہتے تھے۔

وزیر اعلی نے کہا کہ سماج کے ضرورت مندوں کی مدد کے لئے ہمیشہ کمربستہ رہنے والے مسٹر جبار کے انتقال سے جو نقصان ہوا ہے اس کی تکمیل ممکن نہیں ہے۔
وزیر اعلی نے آنجہانی کی روح کو سکون اور غمزدہ خاندان کو اس دکھ کو برداشت کرنے کی طاقت عطا کرنے کی دعا کی۔

بھوپال گیس متاثرین کے لئے حق کی لڑائی لڑنے والے سماجی کارکن عبدالجبار کا کل رات یہاں حرکت قلب بند ہونے کی وجہ سے انتقال ہو گیا ہے۔ وہ 62 برس کے تھے۔