چینی وزارت خارجہ کے ترجمان گینگ شوانگ نے جمعہ کے روز کہا کہ ’14 فروری تک 33 ممالک کی حکومتوں اور چار بین الاقوامی تنظیموں نے چین کو میڈیکل سپلائی کی شکل میں امداد فراہم کرائی ہیں‘۔
انہوں نے کہا کہ چین نے کورونا وائرس کو پھیلنے سے روکنے کے لیے خود ہی زیادہ تر کوششیں کی ہیں اور بین الاقوامی برادری کی جانب سے دی گئی امداد کے لیے چین شکر گزار ہے۔
ترجمان گینگ شوانگ نے کہا کہ ’کورونا وائرس کے خلاف لڑائی میں چین خود کفیل ہے لیکن ہم بین الاقوامی برادری خاص طور پر دیگر ترقی پذیر ممالک سے ملی امداد کا خیر مقدم کرتے ہیں اور شکرگزار ہیں۔‘
انہوں نے مزید کہا کہ اس کے علاوہ دیگر 17 ممالک اور ایک دیگر بین الاقوامی تنظیم نے چین کی مدد کرنے کا اعلان کیا ہے۔
واضح رہے کہ چین میں مہلک کورونا وائرس سے اب تک 1380 افراد کی موت ہوگئی اور اس سے متأثر ہونے والوں کی تعداد بڑھ کر 63851 ہوگئی ہے۔
