بھبھوا: بی جے پی کارکنان نے سابق رکن اسمبلی کو پیٹا

گزشتہ روز کسان کی جانب سے ملک گیر ہرٹال کی کال دی گئی تھی جسے مختلف اپوزیشن جماعتوں کی حمایت حاصل رہی، اسی ضمن میں جن ادھیکار پارٹی کے سابق رکن اسمبلی کے ساتھ مار پیٹ کی گئی۔

ریاست بہار کے ضلع بھبھوا کے سابق رکن اسمبلی رامچندر یادو کی بی جے پی کارکنان نے جم کر پٹائی کر دی۔ اطلاعات کے مطابق پپو یادو کی جن ادھیکار پارٹیزرعی بل کے خلاف ملک گیر بند کی حمایت میں احتجاجی مظاہرہ کررہی تھی، پارٹی کے رہنما اور سابق رکن اسمبلی رام چندر یادو پٹنہ میں احتجاج کر رہے تھے۔

مظاہرین جیسے ہی بی جے دفتر کے پاس پہنچے ویسے ہی بی جے پی کارکنان لاٹھی ڈنڈے لے کر مظاہرین پر ٹوٹ پڑے اور ان کی جم کر پٹائی کر دی، اس دوران رام چندر یادو کو بری طرح سے مارا پیٹا گیا۔

پٹائی کرنے کے بعد بی جے پی کارکنان نے مودی زندہ باد کے نعرہ لگائے، جن ادھیکار پارٹی کے یوتھ صدر کیمور نیاز الدین انصاری نے رام چندر یادو کی پٹائی کی سخت مذمت کرتے ہوئے وزیر اعلی نتیش کمار سے بی جے پی کی اس غنڈہ گردی کے خلاف کاروائی کا مطالبہ کیا ہے۔

نیاز الدین انصاری نے انتباہ دیا کہ اگر حکومت کاروائی نہیں کرتی ہے تو ریاست بھر میں اس کے خلاف احتجاج کیا جائے گا۔