مرکزی وزیر داخلہ امت شاہ سابق مرکزی وزیر ارون جیٹلی کی موت کی اطلاع پر اپنے پروگرام کو مختصر کرتے ہوئے حیدرآباد سے دہلی کے لیے روانہ ہوگئے۔
وہ حیدرآباد کی سردار پٹیل نیشنل پولیس اکیڈیمی میں آئی پی ایس پروبیشنرس کی پاسنگ آوٹ پریڈ میں حصہ لینے کے لیے پہنچے تھے تاہم ارون جیٹلی کی موت کی اطلاع کے ساتھ ہی وہ دہلی روانہ ہوگئے۔
خیال رہے کہ سابق وزیر خزانہ اور بھارتیہ جنتا پارٹی کے سینیئر لیڈر ارون جیٹلی کا سنیچر کو یہاں آل انڈیا انسٹی ٹیوٹ آف میڈیکل سائنسز (ایمس) میں انتقال ہوگیا۔ وہ 67برس کے تھے۔
ان کے کنبہ میں ان کی بیوی، ایک بیٹا اور ایک بیٹی ہے۔ وہ 9 اگست سے ہی ایمس میں داخل تھے۔ ان کی پیدائش 1952 میں دہلی میں ہوئی تھی اور 1974میں انہوں نے سیاست کی شروعات کی تھی۔
واجپئی حکومت کے دوران انہیں 13 اکتوبر 1999کو اطلاعات و نشریات کا وزیرمملکت (آزادنہ چارج) مقرر کیا گیا۔ انہیں وزیر مملکت برائے سرمایہ کشی (آزادانہ چارج) بھی مقرر کیا گیا۔ مودی حکومت کی پہلی مدت کار میں وہ وزیر خزانہ بنے تھے۔
جیٹلی 1982میں جموں وکشمیر کے سابق وزیرخزانہ گردھاری لال ڈوگرہ کی بیٹی سنگیتا کے ساتھ رشتہ ازدواج میں بندھ گئے تھے۔ جیٹلی کے کنبہ میں بیوی، بیٹا روہن اور بیٹی سونالی ہیں۔
