کانگریس کے رہنما راہل گاندھی نے لوک سبھا میں بینک بدعنوانی کا معاملہ اٹھایا جس کے بعد لوک سبھا میں زوردار ہنگامہ ہوا، راہل گاندھی نے سوال کیا کہ بینک ڈیفالٹر کون ہیں جس کے جواب میں مملکتی وزیر برائے خزانہ انوراگ ٹھاکر نے اعدادوشمار پیش کرتے ہوئے کہا کہ 'جتنے بھی ڈیفالٹر ہیں سبھی کی فہرست ویب سائٹ پر موجود ہے اس میں چھاپنے کے لیے کچھ بھی نہیں'۔
پیر کو ایوان کی کارروائی شروع ہوتے ہی حزب اختلاف نے یس بینک بدعنوانی کیس کو لے کر ہنگامہ شروع کر دیا، راہل گاندھی نے حکومت سوال کیا کہ 'ملک کے ٹاپ 50 ولفل بینک ڈیفالٹرز کون ہیں؟ اس پر لوک سبھا میں ہنگامہ شروع ہو گیا۔
راہل گاندھی کے سوال کے جواب میں مرکزی وزیر مملکت برائے خزانہ انوراگ ٹھاکر نے کہا کہ یہ رقم کانگریس حکومت نے تقسیم کی تھی اور اس رقم کی بازیابی کے لئے بی جے پی حکومت نے کام کیا ہے۔
انہوں نے کہا کہ 'لوگوں کو ملک کے بینک کے نظام پر مکمل اعتماد ہے، اور وزیر خزانہ نرملا سیتا رمن پہلے ہی واضح کر چکی ہیں کہ ملک کا ہر بینک مکمل طور پر محفوظ ہے اور یس بینک کے ہر صارف کی رقم بھی محفوظ ہے۔ انہوں نے طنز کرتے ہوئے کہا کہ یس بینک کے بانی کے ساتھ کانگریس کے سابق وزیر خزانہ تصویر کھینچواتے ہیں۔