ریاست اترپردیش کے ضلع بارہ بنکی میں قومی قیادت کی اپیل پر سماجوادی پارٹی کے کارکنان نے ریاست میں بے قابو جرائم سے متعلق میمورنڈم دیا۔
میمورنڈم میں ریاست کے تمام اضلاع میں ہوئے جرائم کا ذکر کرتے ہوئے جرائم کے اعداد و شمار بھی پیش کئے گئے۔ ایس پی کارکنان کا مطالبہ ہے کہ ریاستی حکومت کو برخاست کر کے گورنر راج کا نفاذ کیا جائے۔
دوشنبہ کو سماجوادی پارٹی کے صدر و رکن اسمبلی دھرمراج یادو عرف سریش یادو کی قیادت میں سینکڑوں کی تعداد میں سماجوادی پارٹی کے کارکنان کلکٹریٹ پہونچے اور گورنر کو مخاطب اپر ضلع مجسٹریٹ کو میمورنڈم سونپا۔
میمورنڈم میں ریاست کے تمام اضلاع میں ہوئے جرائم کے اعداد و شمار کے ساتھ بارہ بنکی میں پیش آئے 2 واردات کا الگ سے ذکر کیا گیا ہے۔
سماجوادی پارٹی کے رکن اسمبلی دھرمراج یادو کا الزام ہے کہ ریاست میں بیٹیاں محفوظ نہیں ہیں۔ روز دل دہلانے والے سنگین جرائم پیش آ رہے ہیں، جس سے محسوس ہوتا ہے کہ ملک میں جنگل راج ہو گیا ہے اور ریاست میں جمہوریت بھی ختم ہو گئی ہے۔
