اسرانی: مزاحیہ اداکاری سے ناظرین کے دلوں پر راج کرنے والے اداکار

بالی وڈ میں اسرانی ایک ایسے اداکار کے طور پر شمار کیے جاتے ہیں جنہوں نے اپنی مزاحیہ اداکاری سے پانچ دہائیوں تک سنیما شائقین کو اپنا دیوانہ بنایا ہوا ہے۔

یوم پیدائش کے موقع پر خصوصی پیشکش۔۔۔
یکم جنوری 1941 کو جے پور میں پیدا ہوئے گوورددھن اسرانی بچپن سے ہی اداکار بننے کا خواب دیکھا کرتے تھے۔ سنہ 1963 میں اداکار بننے کا خواب لیے اسرانی ممبئی آ گئے جہاں ان کی ملاقات کشور ساہو اور رشی کیش مکھرجی جیسے فلم سازوں سے ہوئی اور ان کے کہنے پر اسرانی نے فلم اینڈ ٹیلی ویژن انسٹی ٹیوٹ آف انڈیا (ایف ٹی آئی آئی) پونے میں داخلہ لے لیا۔

اسرانی یکم جنوری 1941 کو جے پور میں پیدا ہوئے

سنہ 1966 میں پونے کے فلم انسٹی ٹیوٹ سے اداکاری کی تعلیم مکمل کرنے کے بعد اسرانی ممبئی آ گئے۔انہوں نے اپنے فلمی کیریئر کا آغاز 1967 میں ریلیز فلم ’ہرے کانچ کی چوڑیاں‘ سے کیا۔اسی درمیان اسرانی نے کچھ گجراتی فلموں میں بھی کام کیا۔ 1971 میں آئی فلم 'میرے اپنے'کے ذریعے اسرانی کسی حد تک اپنی شناخت بنانے میں کامیاب رہے۔

اسرانی نے فلمی کیریئر کا آغاز 1967 میں ریلیز فلم ’ہرے کانچ کی چوڑیاں‘ سے کیا

سنہ 1973 میں رشی کیش مکھرجی کی ہدایت میں بنی فلم 'ابھیمان' میں اسرانی نے امیتابھ بچن کے دوست کا کردار نبھایا تھا ۔ اس فلم میں اپنی بااثر اداکاری کیلئے اسرانی بہترین معاون اداکار کے فلم فیئر ایوارڈ کے لیے نامزد بھی کئے گئے تھے۔

سال 1975 میں ریلیز فلم 'شعلے' اسرانی کے فلمی کیرئیر کے لیے میل کا پتھر ثابت ہوئی۔ رمیش شپ کی ہدایت میں بنی فلم شعلے میں انہوں نے جیلر کا کردار نبھایا تھا اور ان کا بولا گیا ڈائیلاگ 'ہم انگریزوں کے زمانے کے جیلر ہیں'۔ آج بھی ناظرین نہیں بھول پائے ہیں۔

فلم شعلے میں انہوں نے جیلر کا کردار نبھایا تھا اور ان کا بولا گیا ڈائیلاگ 'ہم انگریزوں کے زمانے کے جیلر ہیں'۔ آج بھی ناظرین نہیں بھول پائے

سنہ 1977 میں اسرانی نے فلم 'چلا مراری ہیرو بننے' کے ذریعہ ہدایت کاری کے میدان میں قدم رکھا اور فلم میں انہوں نے مرکزی کردار نبھایا تھا ۔ اس فلم میں ان کے مدمقابل بندیا گوسوامی تھیں۔ کامیڈی سے بھرپور اس فلم کو شائقین نے بہت پسند کیا تھا۔

اسرانی نے فلم 'چلا مراری ہیرو بننے' کی کامیابی کے بعد 'سلام میم صاحب، ہم نہیں سدھریں گے، دل ہی تو ہے اور اڑان' جیسی فلموں میں ہدایت کاری کی ۔ اپنے فلمی کیرئیر میں وہ دومرتبہ سرفہرست مزاحیہ اداکار کے فلم فیئر ایوارڈ سے نوازے گئے۔

انہوں نے اپنے زمانے کے تمام عظیم فنکاروں کے ساتھ کام کیا۔ اس کے علاوہ سپر اسٹار راجیش کھنہ کے ساتھ 25 فلموں میں اداکاری کے جوہر دکھائے۔ انہوں نے بالی وڈ کے سپر اسٹار امیتابھ بچن کے ساتھ بھی متعدد فلموں میں کام کیا ہے۔

اسرانی نے اپنے فلمی کیریئر میں تقریبا 400 فلموں میں اپنی اداکاری کے جوہر دکھائے ہیں اور آج بھی اسی جوش خروش کے ساتھ فلم انڈسٹری میں سرگرم ہیں۔