غلام نبی آزاد کے استعفیٰ کی پیشکش پر اویسی کا ردعمل

کانگریس مجلس عاملہ (سی وی سی) کی میٹنگ میں پیر کو پارٹی کے رہنماؤں کی اندرونی خلفشار کی رپورٹز اور راجیہ سبھا میں اپوزیشن کے رہنما غلام نبی آزاد کے استعفیٰ سونپنے کی بات پر آل انڈیا مجلس اتحاد المسلمین کے سربراہ اسد الدین اویسی نے غلام نبی آزاد پر طنز کرتے ہوئے کہا کہ' 45 برس کی غلامی صرف اس لیے' ؟

محترمہ سونیا گاندھی کی صدارت میں آج منعقد سی وی سی کی ورچول میٹنگ میں آئی رپورٹس میں کچھ سینیئر رہنماؤں پر راہل گاندھی کے بھارتیہ جنتا پارٹی (بی جے پی) سے ساز باز کے الزام پر غلام نبی آزاد بہت ناراض ہو گئے۔ ان کی قیادت میں ہی سینیئر کانگریسیوں نے محترمہ گاندھی کو خط لکھا تھا۔ غلام نبی آزاد نے کہا کہ اگر 'بی جے پی سے ساز باز کا الزام ثابت ہوتا ہے تو میں استعفیٰ دے دوں گا'۔

اسی سلسلے میں سابق مرکزی وزیر کپل سبل نے بھی ٹوئٹ کر کے تلخی کا اظہار کیا۔ حالانکہ بعد میں انہوں نے ٹویٹ ڈلیٹ کر دیا تھا۔

اسدالدین اویسی نے غلام نبی آزاد کے استعفیٰ کی بات پر طنز کرتے ہوئے ٹویٹ کیاکہ' شاعرانہ انصاف' غلام نبی صاحب مجھ پر بالکل یہی الزام عائد کرتے تھے۔ اب آپ پر بھی یہی الزام ہے'۔

انہوں نے کہاکہ' 45 برس کی غلامی صرف اس لیے' اب یہ بات ثابت ہوگئی ہے کہ ’جینیاُو دھاری قیادت' کی مخالفت کرنے والا بھی بی ٹیم ہی کہا جائے گا۔ مجھے امید ہے کہ مسلمان اب کانگریس پارٹی سے اعلیٰ درجے کی وفاداری کا مطلب سمجھ جائیں گے'۔