انڈین میڈیکل ایسو سی ایشن اور وزیر داخلہ امیت شاہ کی ویڈیو کانفرنس کے ذریعے بات چیت ہوئی جس میں وزیر داخلہ امیت شاہ نے ڈاکٹروں کو تحفظ کی یقین دہانی کرائی۔
بات چیت دوران امیت شاہ نے کہا 'ہمارے ڈاکٹروں کی اپنے کام کے مقام پر سیکورٹی اور ساکھ سے سمجھوتہ برداشت نہیں کیا جائے گا، ہماری اجتماعی ذمہ داری ہے کہ ہم ان کے لئے ہر وقت سازگار ماحول کو یقینی بنائیں، میں نے ڈاکٹروں کو یقین دلایا ہے کہ مودی حکومت ان کی حفاظت کے لئے پرعزم ہے اور ان سے اپیل کی ہے کہ وہ مجوزہ احتجاج پر دوبارہ غور کریں۔
وہیں اینڈین میڈیکل ایسو سی ایشن نے کہا کہ آج ہماری وزیر داخلہ امیت شاہ، وزیر صحت اور عہدیداروں سے بات چیت ہوئی، خاص طور پر وزیر داخلہ امت شاہ پورے معاملے کو سمجھ رہے ہیں اور پریشان ہیں، 'حکومت ہند نے ڈاکٹروں کی حفاظت کے لئے ضروری اقدامات کرنے کا وعدہ کیا ہے، ہمیں حکومت پر اعتماد ہے، لہذا ہم احتجاج واپس لے رہے ہیں'۔
انڈین میڈیکل ایسو سی ایشن کورونا وائرس کی بیماری کے علاج کی ذمہ داریوں میں مصروف کچھ ڈاکٹروں اور طبی عملے پر حملے کے خلاف احتجاج کرنے کا منصوبہ بنا رہا تھا، جسے اس نے آج واپس لے لیا ہے۔
خاص بات یہ ہے ملک کی متعدد ریاستوں سے ڈاکٹروں کے ساتھ بدسلوکی، مار پیٹ اور گھروں میں داخلے سے انکار کی اطلاعات موصول ہوئی ہیں، جس سے ملک کے تمام ڈاکٹر اور طبی عملہ ناراض ہے۔
