حسین ساگر تالاب شدید بارش کے بعد لبریز

گزشتہ تین روز سے ہونے والی بارش کے باعث حیدرآباد کے تاریخی تالاب حسین ساگر لبریز ہو چکا ہے کل رات ہوئی موسلا دھار بارش کے بعد اس تالاب کا سطح آب میں 20۔514 میٹر تک کا اضافہ درج کیا گیا جبکہ اس کی مکمل سطح آب 514.90 ہے۔

پانی کی سطح میں اضافے کے باعث حسین ساگر کے دروازے کھول دیئے گئے ہیں تاکہ فاضل پانی کو خارج کرتے ہوئے سنگین صورتحال پر قابو پایا جا سکے۔ تالاب کی سطح میں اضافے کے باعث عوام میں تشویش پائی جاتی ہے۔

2001 میں اسی طرح کی شدید بارش کے باعث حسین ساگر کے دامن میں واقع نشیبی علاقے زیر آب آگئے تھے جس کی وجہ سے عوام کو شدید مالی نقصانات کا سامنا کرنا پڑا تھا۔

اس شدید بارش کے باعث حسین ساگر پر واقع سڑک ٹینک بنڈ کو کچھ دن بند کردیا گیا تھا اور حیدرآباد میں واقع ساؤتھ ریجنل انڈین آیئل کارپوریشن یونٹ کو شدید نقصان پہنچا جس کے باعث یونٹ بند کردیا گیا۔

حالیہ بارش کی وجہ سے عوام میں اس سانحہ کی یاد تازہ ہو گئی ہے کمشنر گریٹر حیدرآباد میونسپل کارپوریشن لوکیش کمار نے بتایا کہ جی ایچ ایم سی کی حسین ساگر کی سطح آب پر گہری نظر ہے احتیاط کے طورفاضل پانی خارج کیا جا رہا ہے۔