سیلفی لینے پر سب انسپکٹر لائن حاضر

عام انتخابات کی تاریخوں کے اعلان کے بعد ملک بھر میں ضابطہ اخلاق نافذ ہو گیا ہے، دیگر ریاستوں کی طرح اتر پردیش میں بھی پولیس اہلکارسیاسی پارٹیوں کے جھنڈے اور پوسٹرز اتار رہے ہیں۔

اسی ضمن میں ریاست اتر پردیش کے ضلع اناؤ میں ایک سب انسپکٹر نے اپنے ساتھی پولیس اہلکار کے ساتھ سیلفی لے لی لیکن اسے لائن حاضر ہونا پڑا۔

بتایا جا رہا ہے کہ ضلع اناؤ میں سب انسپکٹر اپنی ٹیم کے ہمراہ سیاسی پارٹیوں کے جھنڈے اور بینرز اتارنے آئے تھے۔ ایک بجلی کے کھمبے پر سیاسی پارٹی کے لگے ہوئے بینر کو ہٹانے کے لیے انہوں نے ایک پولیس اہلکار کو کھمبے پر چڑھا دیا۔

جب سپاہی کھمبے پر چڑھا تو سب انسپکٹر نے اس کے ساتھ ایک سیلفی لے کر سوشل میڈیا پرشیئر کر دیا جو وائرل ہو گیا۔

پولیس محکمے کو جب اس کی اطلاع ملی تو سب انسپکٹر کو فوراً لائن حاضرکردیا گیا۔