ریاست بہار کے ضلع مظفرپور کے علاقے گائے گھاٹ میں قومی شاہراہ پر ایک بڑا حادثہ پیش آیا، جہاں ایک تیز رفتار کار پلٹ گئی، کار پلٹنے سے کار میں آگ لگ گئی۔
اس حادثے میں کار میں سوار ایک نوجوان زندہ جل کر ہلاک ہو گیا۔ وہیں ایک شخص شدید طور پر زخمی ہوا ہے جس کا علاج ایس کے ایم سی ایچ میں چل رہا ہے۔
گائے گھاٹ تھانہ کے پولیس افسر نے بتایا کہ این ایچ 57 پر کار حادثے کی خبر ملی، جس کے بعد پولیس جائے واردات پر پہنچی جہاں تباہ حالت میں کار پڑی تھی۔ انھوں نے بتایا کہ ایک نوجوان سڑک کے کنارے زخمی حالت میں پڑا تھا۔
کار میں جب دیکھا گیا تو ایک شخص کی زندہ جلنے کے سبب موت ہو چکی تھی۔ انھوں نے بتایا کہ لاش کو پوسٹ مارٹم کے لیے ایس کے ایم سی ایچ بھیجا گیا، اور زخمی شخص کا بھی علاج اسی ہسپتال میں چل رہا ہے۔
قومی شاہراہ 57 پر کار میں لگی آگ کی وجہ کا پتہ نہیں چل سکا ہے، جائے واردات پر موجود لوگوں نے بتایا کہ کار تیز رفتاری سے آرہی تھی کہ اچانک کار نے کنٹرول کھو دیا اور حادثہ ہو گیا، جس میں گاڑی کا دروازہ نہ کھلنے کے سبب ایک شخص گاڑی ہی میں زندہ جل گیا۔ حادثے کی شکار کار دربھنگہ کی ہے۔
