جنوبی کلکتہ کے بعض علاقے بیہالا، مہیش تلہ کے آس پاس علاقے متاثر ہیں۔ کولکاتا میونسپل کارپوریشن نے بھی ڈینگو کے معاملوں کی تصدیق کی ہے۔
کولکاتا میونسپل کارپوریشن کے مطابق اب تک ڈینگو کے 300کیس درج کیے گئے ہیں۔ میونسپل کارپوریشن کے محکمہ صحت کے افسران نے اعداد و شمار بتاتے ہوئے کہا کہ سب سے زیادہ بے ہالا علاقے کے دو وارڈ متاثر ہیں۔
ڈینگو کی شروعات جون سے ہوئی تھی مگر سب سے زیادہ کیس جولائی میں سامنے آئے۔تاہم افسر نے کہا کہ اب تک ڈینگو کی وجہ سے کوئی بھی ہلاک نہیں ہوا ہے۔
تاہم کچھ مریض آئی سی یو میں زیر علاج ہیں۔کولکاتا میونسپل کارپوریشن کے وارڈ نمبر 131اور 132سب سے زیادہ ڈینگو سے متاثر ہیں۔
کولکاتا میونسپل کارپوریشن کے مطابق زیر تعمیر عمارتوں میں پانی جمنے کی وجہ سے ڈینگو کے کیس سامنے آرہے ہیں۔
افسران نے کہا کہ کارپوریشن کی رپیڈ ایکشن ٹیم علاقے کا دورہ کرکے ایسی جگہوں کی شناخت کررہی ہے۔جہاں جہاں پانی جمع ہے وہاں پانی کو بہانے کے علاوہ بڑے پیمانے پر دواؤں کا چھڑکاؤ کیا جارہا ہے۔
انہوں نے کہاکہ بے ہالا کے علاوہ جادو پور، موکندو پور،الٹاڈانگہ اور نارکل ڈانگہ علاقے سے بھی کیس سامنے آئے ہیں۔
