بسوراج بومئی بنے کرناٹک کے نئے وزیراعلیٰ

یدی یورپا کے استعفیٰ کے بعد ریاست کرناٹک میں آج بی جے پی کی میٹنگ ہوئی جس میں اتفاق رائے سے بسوراج بومئی کو ریاست کا نیا وزیراعلیٰ منتخب کیا گیا۔ بھارتیہ جنتا پارٹی کے سینیئر رہنما بی ایس یدی یورپا نے گزشتہ روز وزارت اعلیٰ کے عہدے سے استعفیٰ دے دیا تھا۔

کرناٹک کے سابق وزیر داخلہ بسوراج بومئی ریاست کے نئے وزیر اعلی منتخب ہوئے ہیں۔ بنگلور شہر کی کیپیٹل ہوٹل میں منعقد بی جے پی کے ارکان اسمبلی کی میٹنگ کے دوران ان کے نام پہ مہر لگائی گئی۔

بھارتیہ جنتا پارٹی ارکان اسمبلی کے اجلاس میں طے پایا کہ بسوراج ایس بومئی کو کرناٹک کا نیا وزیراعلیٰ منتخب کیا جائے جس کے بعد سابق وزیراعلیٰ بی ایس یی یورپا نے بسوراج بومئی کو وزیراعلیٰ بنانے کا اعلان کیا۔

بسوراج بومئی بی ایس یدی یورپا حکومت میں وزیر داخلہ تھے اور وزیراعلیٰ کے عہدے کے اعلی دعویداروں میں شامل تھے۔ بومئی لنگایت سماج سے تعلق رکھتے ہیں۔

بسوراج بومئی 2018 سے یدی یورپا کے وزیراعلی کی مدت کے دوران کرناٹک کے وزیر داخلہ، قانون اور پارلیمانی امور کے وزیر کی حیثیت سے خدمات انجام دیں۔

بومئی نے ہاویری اور اُڈوپی ڈسٹرکٹ انچارج وزیر کی حیثیت سے بھی خدمات انجام دی ہیں۔ اس سے قبل انہوں نے وزیر آبی وسائل کی حیثیت سے بھی کام کیا ہے۔ وہ کرناٹک کے سابق وزیراعلیٰ، ایس آر بومائی کے بیٹے ہیں۔

بسوراج بومئی مکینیکل انجینئرنگ کی تعلیم حاصل کی ہے اور جنتادل پارٹی سے اپنا سیاسی کریئر شروع کیا تھا۔

بومئی دھارواڈ مقامی انتظامیہ حلقہ سے دو بار (1998 اور 2004 ) کرناٹک قانون ساز کونسل کے ممبر کے طور پر منتخب ہوئے تھے۔

اس کے بعد انہوں نے جنتادل (متحدہ) کو چھوڑ دیا اور فروری 2008 میں بھارتیہ جنتا پارٹی میں شمولیت اختیار کر لی تھی۔ 2008 کرناٹک اسمبلی انتخابات میں وہ ہاویری ضلع کے شیگاؤں حلقہ سے رکن اسمبلی منتخب ہوئے تھے۔