اعظم خاں کے یوم پیدائش پربچوں میں کاپی قلم تقسیم

سماجوادی پارٹی کے قدآور رہنماء اور رکن پارلیمان اعظم خاں کے 74 ویں یوم پیدائش پر ریاست اترپردیش کے رامپور میں سماجوادی کارکنان نے ضرورت مند بچوں کو کاپی، کتابیں اور پینسل وغیرہ تقسیم کرکے یوم پیدائش کا اہتمام کیا اور یہ پیغام دیا کہ اعظم خاں کا مشن تعلیم کو فروغ دینا ہے اس لئے ان کی یوم پیدائش پر اس کا اہتمام کیا جا رہا ہے۔

رکن پارلیمان اعظم خاں کے حامی مختلف انداز میں اپنے رہنما کے یوم پیدائش کا اہتمام کر رہے ہیں۔

سماجوادی پسماندہ محاذ کے ضلع صدر راج ایڈووکیٹ کی قیادت میں اعظم خاں کے حامیوں نے غریب بستیوں میں پہنچ کر بچوں کو کاپی، قلم اور کتابیں و کھانے کی اشیاء تقسیم کر رہے ہیں۔
اس موقع پر وکی راج ایڈووکیٹ نے کہا کہ آج عظیم تعلیم دوست اور محمد علی جوہر یونیورسٹی کے بانی اعظم خاں کا یوم پیدائش ہے۔

اعظم خاں نے ہمیشہ تعلیم کو فروغ دینے اور اس کو عام کرنے کی جدو جہد کی ہے۔

تعلیم کے میدان میں ان کی قربانیوں کو بھلایا نہیں جا سکتا ہے۔

یہی وجہ ہے کہ آج اعظم خاں عظیم تعلیمی ادارہ محمد علی جوہر یونیورسٹی کے قیام کی پاداش میں ہی سیتاپور جیل میں قید و بند کی آزمائش سے گزر رہے ہیں۔

وکی نے کہا کہ صحیح معنوں میں اعظم خاں نے ہی سر سید احمد خان کے تعلیمی مشن کو آگے بڑھایا ہے۔

اس موقع پر وکی راج ایڈووکیٹ کے علاوہ محمد شیزی، ساجد رضا، تنویر میاں، محمد گلویز اور وویک سندھواسی وغیرہ بھی موجود رہے۔