Attack on Muslim Youth ہولی کے دن مسلم نوجوان پر جان لیوا حملہ، چھ گرفتار

ممبئی میں ساکی ناکہ پولیس تھانے کی حد میں ہولی کے دن ایک مسلم شخص پر جان لیوا حملہ کیا گیا۔ بتایا جا رہا ہے کہ پہلے اُس کا نام پوچھا گیا۔ اس کے بعد اسے زدوکوب کیا گیا۔

ممبئی:ریاست مہاراشٹر کے ممبئی میں ساکی ناکہ پولیس تھانے کی حد میں ہولی کے دن ایک مسلم شخص پر جان لیوا حملہ کیا گیا۔ بتایا جا رہا ہے کہ پہلے اُس کا نام پوچھا گیا۔ اس کے بعد اسے زدوکوب کیا گیا۔ پولیس نے اس معاملے میں چھ ملزمین کو گرفتار کر لیا ہے جبکہ 3 کی تلاش جاری ہے۔ ممبئی پولیس نے اس واردات کے بعد علاقے میں نظم و نسق برقرار رکھنے کی اپیل کی ہے۔ متاثرہ نوجوان ہسپتال میں زیر اعلاج ہے۔

اطلاعات کے مطابق اویس شاہ سات مارچ کو جری مری علاقہ میں کہیں جا رہے تھے، اسی دوران ہولی کھیل رہے کچھ شرپسندوں نے پہلے ان سے بدتمیزی کی، اس کے بعد نام پوچھا، جیسے ہی پتا چلا کہ وہ شخص مسلم ہے۔ اُس کے بعد اویس کو بری طرح مارا پیٹا گیا۔ زخمی حالت میں اویس کو ممبئی کے کیم ہسپتال میں داخل کرایا گیا ہے، جہاں اُس کا اعلاج چل رہا ہے۔ اس واردات کی ویڈیو سی سی ٹی وی کیمرے میں قید ہوگئی ہے۔

ممبئی مجلس کے صدر فیاض احمد خان نے کیم ہسپتال میں اویس کا حال دریافت کیا، اُنہوں نے کیم ہسپتال کے ڈین سے بات چیت کی ہے۔ اس ضمن میں زونل ڈی سی پی مہیشور ریڈی نے بتایا کہ ممبئی پولیس نے دفعہ 307 کے تحت ایف آئی آر درج کر کے چھ لوگوں کو گرفتار کر لیا ہے جبکہ 3 لوگ ابھی بھی فرار ہیں۔ زونل ڈی سی پی مہیشور ریڈی نے بتایا کہ ہولی کے دن متاثرہ شخص کا کچھ سامان اس جگہ پر رکھا تھا، جب اُس کا وہاں سے گزر ہوا تو وہاں ہولی کھیلنے والوں نے اس کی شرٹ پر رنگ لگا دیا۔ مخالفت کرنے پر ہولی کھیلنے والوں نے اسے بری طرح سے پیٹا۔ علاقے میں مقامی پولیس نے نظم و نسق برقرار رکھنے کی اپیل کی ہے۔