Assam Students Protest In Delhi آسام طلبا تنظیم کا دہلی کے جنتر منتر پر احتجاجی مظاہرہ

احتجاج کے دوران آسام میں جاری بلڈوزر کی سیاست پر روک لگانے، مسلمانوں کے خلاف حکومتی سطح پر ہو رہی زیادتی اور آل بی ٹی سی مائنارٹی اسٹوڈنٹس یونین کے سابق صدر شہید لفیق الاسلام احمد کے ملزمان کو سزا دلانے کا مطالبہ کیا گیا۔Assam Students Protest In Delhi

قومی دارالحکومت دہلی کے جنتر منتر پر آج آسام کی طلبا تنظیم (آل بی ٹی سی مائنارٹی اسٹوڈنٹس یونین) کی جانب سے انصاف، تحفظ اور حقوق کے عنوان پر احتجاجی مظاہرہ کیا گیا۔ احتجاج کے دوران آسام میں جاری بلڈوزر کی سیاست پر روک لگانے، مسلمانوں کے خلاف حکومتی سطح پر ہو رہی زیادتی اور آل بی ٹی سی مائنارٹی اسٹوڈنٹس یونین کے سابق صدر شہید لفیق الاسلام احمد کے ملزمان کو سزا دلانے کا مطالبہ کیا گیا۔Assam Students Protest In Delhi

اس موقع پر ای ٹی وی بھارت کے نمائندے نے آسام طلبا تنظیم اے بی ایم ایس یو کے صدر اشرف الاسلام سے بات کی، جس میں انہوں نے بتایا کہ آسام میں اقلیتی برادری پر این آر سی کے نام پر ظلم کیا جا رہا ہے، انہیں ان کی زمینوں سے نکالنے کی کارروائی کی جا رہی ہے۔ انہوں نے مزید کہا کہ جس طرح سے آسام میں مدارس پر بلڈوزر کی کارروائی کی جا رہی ہے وہ سراسر غلط ہے، ہم اس کی مخالفت کرتے ہیں۔ اسی لیے ہم نے آج دارالحکومت دہلی سے اس احتجاجی مظاہرے کا انعقاد کیا ہے۔ اگر حکومت نے ہمارے مطالبات کو قبول نہیں کیا تو وہ دہلی سے آسام تک سبھی جگہ احتجاجی مظاہرے کریں گے۔

وہیں اس احتجاج کو حمایت دینے جنتر منتر پہنچے این سی پی رہنما شیخ جلانی نے ای ٹی وی بھارت کے نمائندے سے بات کرتے ہوئے کہا کہ ایسا لگ رہا ہے کہ آسام میں کوئی قانون ہے ہی نہیں۔ مدارس اور گھروں پر بغیر کسی عدالتی حکم کے بلڈوزر چلا دیا جاتا ہے۔ انہوں نے مزید کہا کہ وہ یہی نہیں رک رہے بلکہ اب تو آسام کے مدارس کی زمینوں پر بھی حکومت قبضہ کر رہی ہے، حالانکہ اس کے خلاف کچھ لوگوں نے عدالت عظمی کا بھی رخ کیا ہے۔ تو اب زمین سے لیکر عدالت تک اس لڑائی کو لڑا جائے گا۔

یونائیٹڈ اگینسٹ ہیٹ کے بانی ندیم خان نے بتایا کہ یہ طلباء آسام کے بوڈو ٹیریٹورئل علاقے سے دہلی میں احتجاج کرنے آئے ہیں، ان کا سب سے اہم مطالبہ بے دخلی سے متعلق ہے چاہے وہ مدارس سے ہو یا ان کی آبائی زمینوں سے ہو۔ آسام کی طلبا تنظیم نے انتباہ دیا ہے کہ اگر حکومت ہمارے مطالبات کو قبول نہیں کرتی ہے تو ہم دہلی سے آسام تک سبھی جگہ احتجاجی مظاہرے کریں گے۔