اشونی اپادھیائے کی ضمانت منظور

دارالحکومت دہلی کے جنتر منتر پر گزشتہ دنوں مسلمانوں کے خلاف نعرے بازی کو لے کر بی جے پی کے سابق ترجمان اشونی اپادھیائے کو دہلی پولیس نے گرفتار کیا تھا جس کے بعد دہلی پولیس نے 14 دن کی عدالتی تحویل مانگی تھی۔

عدالت نے اشونی اپادھیائے کو 2 دن کی عدالتی تحویل میں دینے کا فیصلہ سُنایا تھا۔ جس کے بعد آج میٹرو پولیٹن مجسٹریٹ نے 50 ہزار کے مچلکہ کے ساتھ اشونی اپادھیائے کی ضمانت منظور کر لی۔اشونی اپادھیائے کے خلاف جن دفعات کی بنیاد پر کیس درج کیا گیا تھا وہ سبھی بہت چھوٹی تھی جس کی وجہ سے مجسٹریٹ نے ضمانت کی درخواست کو رد نہ کرتے ہوئے اسے منظور کرلیا۔

دارالحکومت دہلی کے جنتر منتر پر گزشتہ دنوں بھارت جوڑو تحریک کی آڑ میں جس طرح سے مسلمانوں کے خلاف زبردست اشتعال انگیزی کی گئی تھی اور کھلے عام مسلمانوں کو دھمکیاں دی گئیں اس کے بعد مسلمانوں نے غصہ کا اظہار کیا تھا۔

جس کے بعد دہلی پولیس نے ایڈوکیٹ اشونی اپادھیائے کو گرفتار کیا تھا۔ جنتر منتر پر گزشتہ دنوں بھارت چھوڑو تحریک کی سالگرہ کے موقع پر ایڈووکیٹ اشونی اپادھیائے نے بھارت جوڑو مارچ شروع کیا تھا۔

اس مارچ میں انگریزوں کے زمانے کے قانون بدلنے جیسے کئی مطالبات کیے گئے تھے۔ لیکن ان سب مطالبات کو درکنار کرکے وہاں مسلمانوں کے خلاف جس طرح زہر اگلا گیا اور قتل کرنے کی دھمکیاں دی گئیں اس سے ملک کا ماحول خراب ہوا ہے۔