یوگی کے بیان پر بھڑکے اویسی، کہا 'یہ آئین کی توہین ہے'

اترپردیش کے وزیراعلیٰ یوگی آدتیہ ناتھ کے سیکولرازم پر دیئے گئے بیان پر آل انڈیا مجلس اتحاد المسلمین کے سربراہ اسد الدین اویسی نے سخت بیان دیا ہے۔

اتر پردیش کے وزیر اعلی یوگی آدتیہ ناتھ نے ایک بیان میں کہا ہے کہ 'بھارت کی تہذیب، ثقافت اور روایات کے لیے سیکولرازم بڑا خطرہ ہے۔ ہمیں اس پر قابو پانا ہوگا۔'

اس پر اسد الدین اویسی نے شدید رد عمل دیتے ہوئے کہا کہ 'یوگی آدتیہ ناتھ کا یہ بیان آئین کی توہین کے مترادف ہے۔' انہوں نے کہا کہ 'سنگھ پریوار ہمیشہ کہتا ہے کہ 'آئین میں لفظ سیکولرازم بعد میں شامل کیا گیا ہے پہلے یہ لفظ آئین میں نہیں تھا۔'

اویسی نے کہا کہ 'سیکولرازم بھارتی آئین کے بنیادی ڈھانچے کا ایک حصہ ہے۔ یہ آئین کے مختلف حصوں میں بھی ظاہر ہوتا ہے۔ آزادی، بھائی چارہ اور مذہب اور عبادت کی مساوات آئین کا ایک اہم حصہ ہے۔ آئین کے آرٹیکل 14، 19، 22، 25، 26، 29 اور 30 ​​ہماری سیکولر روایت کی عکاسی کرتے ہیں۔'