Owaisi Speech in Lok Sabha: حکومت ایس سی لسٹ میں مسلمانوں اور عیسائیوں کو شامل کرے

ایم آئی ایم کے سربراہ اسدالدین اویسی نے کل یعنی 10 اگست کو لوک سبھا میں کہا کہ بی جے پی حکومت او بی سی سماج کے مفاد میں نہیں ہے بلکہ صرف ان کے ووٹ کے لیے ہے۔ سنہ 1950 میں مسلم اور عیسائی دلتوں کو ایس سی کی فہرست سے خارج کردیا گیا تھا، حکومت جلد از جلد مذہب کی بنیاد پر ریزرویشن ختم کریں۔

لوک سبھا میں منگل کے روز پسماندہ طبقات (او بی سی) سے متعلق 'آئین (127ویں ترمیم) بل، 2021' منظور کیا۔ اس پر بحث کے دوران اے آئی ایم آئی ایم کے رکن پارلیمنٹ اسد الدین اویسی نے کہا کہ حکومت نے یہ بل لاکر شاہ بانو کی روایت کو برقرار رکھا ہے۔ یہ حکومت او بی سی کے لیے نہیں ہے۔ مسلمانوں کی پسماندہ ذات کو تلنگانہ میں ریزرویشن ملتا ہے لیکن مرکز میں نہیں۔ ہمیں ریزرویشن نہیں بلکہ افطار کی دعوت اور کھجور ملے گی۔

اویسی نے کہا کہ جب ایس سی کاسٹ میں ہندو اور بودھ آسکتے ہیں تو پھر مسلمانوں کو اس میں کیوں شامل نہیں کیا جاسکتا۔ 1950 کا صدارتی حکم مذہب سے پاک ہونا چاہیے۔ انہوں نے کہا کہ مودی حکومت کیوں خوفزدہ ہے۔

اسدالدین اویسی کا ٹیوٹ

انہوں نے حکومت پر الزام عائد کرتے ہوئے کہا کہ آپ کی محبت او بی سی سے نہیں، ووٹ سے ہے۔ اویسی نے کہا کہ مہاراشٹر میں مسلمانوں کی 50 پسماندہ ذاتوں کے بارے میں کوئی بات نہیں کرتا، صرف مراٹھا ریزرویشن کی بات کی جاتی ہے۔

انہوں نے مزید کہا کہ او بی سی کمیونٹی کے مفادات کے تحفظ کے لئے حکومت کی پالیسی اور نیت دونوں واضح ہے۔ سال 2018 میں 102ویں ترمیم کے وقت، سب نے اس کی حمایت کی تھی۔ اس بل کے ذریعے ریاستوں کے جو اختیارات ختم ہوگئے تھے ان کو بحال کیا گيا ہے۔