تیجپور:اروناچل پردیش کی سرحد سے آٹھ سال قبل لاپتہ ہونے والے تپور پلوم کا معاملہ ایک بار پھر اس کے اہل خانہ نے اٹھایا ہے۔ گھر والوں کو چین کے ذریعہ اس کے پکڑے جانے کا شبہ ہے۔ اس سلسلے میں گھر والوں نے ارکان پارلیمنٹ، مرکزی وزراء حتیٰ کہ وزیر دفاع سے بھی مدد کی اپیل کی، لیکن انہیں اب تک کوئی مدد نہیں ملی۔ جانکاری کے مطابق اروناچل پردیش کے رہنے والے ٹپور پلوم آٹھ سال سے لاپتہ ہیں۔
گھر والوں کو شبہ ہے کہ چینی فوج اسے پکڑ کر لے گئی۔ ٹپور پلوم کی بہو امنی دیرو نے بھی اس سلسلے میں وزیر دفاع کو ایک خط لکھا ہے۔ یہ پریشان کن کہانی ستمبر 2015 کے پہلے ہفتے کی ہے، جب ٹپور پلوم اور اس کا دوست تاک یارشی مشرقی اروناچل پردیش کے شی یومی ضلع میں ٹیگی بوگو پاس کے نام سے مشہور سرحدی علاقے کے قریب شکار پر گئے تھے۔ ان کو 21 ستمبر کو واپس آنا تھا، لیکن صرف تاک یارشی ہی واپس آئے، ایک دلخراش کہانی سناتے ہوئے انہوں نے بتایا کہ چینی فوجیوں نے سرحد میں گھس کر ٹپور پلوم کو اغوا کر لیا تھا جب کہ وہ فرار ہونے میں کامیاب ہو گئے تھے۔
پلوم کے اہل خانہ نے اس کے بعد اس کی تلاش شروع کی اور اس کے پیچھے چھوڑے گئے سامان کو برآمد کیا۔ انہوں نے مقامی پولیس اور فوج کو واقعے کی اطلاع دی۔ دسمبر میں، امنی دیرو نے مرکزی وزیر کرن رجیجو سے رابطہ کرکے انہیں صورتحال سے آگاہ کیا۔ 2022 میں چینی فوج کے ہاتھوں میرام تارون کے اغوا کے بعد اسے بڑی مشکل سے واپس لایا گیا۔ امنی دیرو نے ایک بار پھر ٹپور پلوم کے معاملے کو اٹھایا۔
مزید پڑھیں: Shamli Family Freed from Pakistan شاملی کا مسلم خاندان یوم آزادی سے پہلے پاکستان کی قید سے رہا
مشرقی اروناچل پردیش کے رکن پارلیمنٹ تاپیر گاؤ نے 2022 میں پارلیمانی حلقہ میں یہ مسئلہ اٹھایا، جس کی وجہ سے وزیر خارجہ ایس جے شنکر نے چینی ہم منصبوں کے ساتھ بات چیت کی۔ تاہم امنی دیرو نے اس بات پر تشویش کا اظہار کیا کہ اس معاملے پر مناسب توجہ نہیں دی گئی۔ اس معاملے کو زندہ رکھنے کے لیے، پلوم کے بیٹے وکی پلوم نے اس وقت کے مرکزی وزیر قانون کرن رجیجو کو خط لکھا، جب کہ رکن پارلیمنٹ تاپیر گاؤ نے اس سال مارچ میں مرکزی وزیر داخلہ امیت شاہ کو مطلع کیا۔ تلاش کی انتھک کوششوں کے درمیان امنی دیرو نے ایک اہم سوال پوچھا کہ کیا ٹپور پلوم اب بھی زندہ ہے؟
