عرشی خان کو افغان کرکٹر سے منگنی ٹوٹنے کا خدشہ

ٹی وی اداکارہ عرشی خان نے انکشاف کیا ہے کہ ان کی منگنی ایک افغان کرکٹر سے ہونی تھی جسے ان کے والد نے منتخب کیا تھا لیکن اب انہیں خدشہ ہے کہ افغانستان پر طالبان کے قبضے کی وجہ سے ان کے خاندان کو منگنی ختم کرنی پڑسکتی ہے۔

افغانستان پر طالبان کے قبضے نے ہزاروں لوگوں کی زندگیوں کو متاثر کیا ہے۔ ٹی وی اداکارہ عرشی خان بھی اس سے نہیں بچ سکیں۔ انھیں خدشہ ہے کہ افغانستان کے کرکٹر کے ساتھ اس کے تعلقات ختم ہوجائیں گے۔ عرشی اور افغان کرکٹر کی رواں سال اکتوبر میں منگنی ہونے والی تھی۔

عرشی خان نے یہ نہیں بتایا کہ یہ افغانستان کا کرکٹر کون ہے لیکن انھوں نے اتنا ضرور کہا ہے کہ لڑکا ان کے والد کی پسند کا ہے۔

عرشی خان کے حوالے سے ایک نیوز چینل نے لکھا 'میری اکتوبر میں افغانستان کے کرکٹر کے ساتھ منگنی ہونے والی تھی۔ میرے والد نے اسے پسند کیا ہے، لیکن اب ہمیں افغانستان پر طالبان کے قبضے کی وجہ سے یہ تعلق ختم کرنا پڑسکتا ہے۔

عرشی خان نے یہ بھی کہا کہ وہ افغان کرکٹر کے ساتھ رابطے میں ہیں۔ عرشی نے کہا کہ وہ میرے والد کے دوست کا بیٹا ہے۔ ہم اور افغان کرکٹرز بھی دوست ہیں لیکن مجھے یقین ہے کہ میرے والدین اب میرے لیے ایک بھارتی لڑکے کی تلاش کریں گے۔

اکتیس سالہ عرشی خان نے یہ بھی بتایا کہ ان کا خاندانی شجرہ افغانستان سے ہے۔ تاہم جب عرشی 4 سال کی تھیں تو ان کا خاندان بھارت چلا گیا تھا۔

عرشی خان نے کہا کہ میں افغانی پٹھان ہوں، میرے دادا جی افغانستان سے آکر بھارت میں آباد ہوگئے تھے اور وہ بھوپال میں جیلر کے عہدہ پر فائز تھے، میں اپنے والدین اور دادا دادی کی ہی طرح بھارتی شہری ہوں۔

عرشی خان ساوتری دیوی کالج اینڈ ہسپتال، عشق میں مرجاواں اور وش جیسے شوز میں کام کرچکی ہیں۔ وہ بگ باس 14 میں شامل ہونے سے پہلے بگ باس 11 کا حصہ رہی تھیں۔

عرشی بگ باس 14 میں دوسری بار آئیں۔ اس ریالٹی شو میں عرشی کی اردو زبان کو بہت پسند کیا گیا۔ شو کے ہوسٹ اداکار سلمان خان بھی کئی بار عرشی خان کی اردو زبان کی تعریف کرتے ہوئے دیکھے گئے۔