ارنب گوسوامی جیل سے رہا

ارنب گوسوامی نےجیل سےنکلنے کے بعد وکٹری کا نشان بنایا اور ’بھارت ماتا کی جے، وندے ماترم‘ کا نعرہ لگایا۔

ایک انٹیریئر ڈیزائنر کو خودکشی پر اکسانے کے الزام میں گرفتار ری پبلک ٹی وی کے ایڈیٹر ان چیف ارنب گوسوامی بدھ کی شام تلوجا جیل سے رہا ہوگئے ہیں۔

سپریم کورٹ نے بدھ کو دن میں ارنب گوسوامی اور دو دیگر ملزمین نتیش ساردا اور پروین راجیش سنگھ کو 50-50 ہزار روپئے کے نجی بانڈ پر عبوری ضمانت دیتے ہوئے فوراً رہا کرنے کا حکم دیا تھا۔ اس سے پہلے بامبے ہائی کورٹ نے ارنب کی ضمانت مسترد کرتے ہوئے نچلی عدالت کے پاس جانے کے لئے کہا تھا۔

گوسوامی جیسے ہی سفید کار میں تلوجا جیل سے باہر آئے وہاں موجود لوگوں کے ہجوم نے کار کو گھیر لیا۔ انہوں نے کار سے باہر نکلتے ہوئے وکٹری کا نشان بنایا اور ’بھارت ماتا کی جے، وندے ماترم‘ کا نعرہ لگایا۔

گوسوامی نے کہا ’ میں سپریم کورٹ کا شکرگزار ہوں ، یہ ملک کے لوگوں کی جیت ہے۔ واضح رہے کہ مہاراشٹر پولیس نے ایک ہفتہ قبل ارنب گوسوامی کو گرفتار کیا تھا۔