آندھراپردیش ہائیکورٹ نے الیکشن کمیشن کے احکام پر روک لگائی

اے پی ہائیکورٹ نے راشن پہنچانے والی گاڑیوں کے رنگ کی تبدیلی کے الیکشن کمیشن کے احکام پر روک لگا دی۔

آندھراپردیش ہائیکورٹ سے ریاستی حکومت کو راحت ملی ہے کیونکہ عدالت نے ریاست میں راشن گھرگھر فراہم کرنے والی گاڑیوں کے رنگ کو بدلنے کے لئے دیئے گئے احکام پر روک لگادی۔

عدالت نے کہا کہ اس خصوص میں اس کی جانب سے جاری کردہ عبوری احکام 15مارچ تک نافذ العمل رہیں گے۔ریاست میں انتخابی ضابطہ اخلاق کے نافذ ہونے کی وجہ سے ان گاڑیوں کے رنگ کو بدلنے کی ہدایت ریاستی الیکشن کمیشن نے دی تھی۔

ریاستی الیکشن کمشنر نماگڈہ رمیش نے ان گاڑیون کا معائنہ کیا تھا اور ریاست میں پنچایت انتخابات کے پیش نظر ان کے رنگ کو بدلنے کے احکام دیئے تھے۔

ریاست کی جگن موہن ریڈی زیرقیادت ریاستی حکومت نے ان احکام کو اے پی ہائی کورٹ میں چیلنج کیا تھا۔عدالت نے اس معاملے کی سماعت کرتے ہوئے ریاستی الیکشن کمیشن کے احکام پر روک لگادی۔