آندھراپردیش کے وزیراعلی وائی ایس جگن موہن ریڈی اور ان کی اہلیہ بھارتی نے گنٹور کے بھارت پیٹ میں واقع سکریٹریٹ کے 140ویں کمرہ میں کووڈ کا ٹیکہ لیا۔ وزیراعلی نے وارڈ/ولیج سکریڑیٹ کے لیے اس ٹیکہ اندازی کے پروگرام کا آغاز کیا۔
اس موقع پرانہوں نے تمام اہل افراد، جن کی عمر 45 برس سے زائد ہے، پر زوردیا کہ وہ ٹیکہ لیں۔ انہوں نے کہا کہ ریاست میں ٹیکہ کاری کا پروگرام 90 دن میں مکمل کرلیا جائے گا۔
انہوں نے کہا کہ ٹیکہ اندازی ہی اس انفکشن سے بچنے کا واحد راستہ ہے۔ حکومت نے بڑے پیمانہ پر ٹیکہ کاری کی مہم کی شروعات کی ہے جس کی مثال ملک میں کہیں نہیں ملتی۔
انہوں نے کہا کہ ولیج والٹنرس گھر گھر سروے کریں گے اور آشا ورکرس اس بات کو یقینی بنائیں گے کہ ہر گھر کے اہل افراد کو ٹیکہ دیاجائے۔ والنٹرس تفصیلات حاصل کرتے ہوئے ناموں کا اندراج کریں گے اور ٹیکہ کاری کی تاریخ دیں گے۔
وزیراعلی نے کہا کہ احتیاطی اقدامات کے حصہ کے طورپر ایمبولنس گاڑی کو ڈاکٹرس اور دیگر طبی اسٹاف کے ساتھ سکریٹریٹ میں رکھا جائے گا جس کو ایک اکائی بنایا گیا ہے اور ٹیکہ کاری کا پروگرام یگنم کی طرح انجام دیا جائے گا۔ ٹیکہ کاری کے بعد وزیراعلی کو کچھ دیر کے لیے نگرانی میں رکھا گیا اور بعد ازاں انہوں نے ڈاکٹرس و سکریٹریٹ کے اسٹاف کے ساتھ بات چیت کی۔
یواین آئی
