سدھو کا تعلق پاکستان سے ہے، ان کا وزیر اعلیٰ بننا قومی سلامتی کے لیے خطرہ ہے: امریندر

پنجاب کے وزیراعلیٰ کے عہدے سے استعفیٰ دینے کے بعد امریندر سنگھ نے نوجوت سنگھ سدھو پر حملہ کرتے ہوئے کہا کہ، ' نوجوت سنگھ سدھو نااہل آدمی ہیں۔ وزیر اعلیٰ کے عہدے کے لیے نوجوت سنگھ سدھو کے نام کے امکان کی مخالفت کرتے ہوئے انہوں نے کہا کہ'، جو ایک وزارت صحیح طریقے سے نہیں چلا سکا، وہ ریاست کو کیا چلائیں گے۔'

امریندر سنگھ نے کہا، 'میں اگلے وزیراعلیٰ کے چہرے کے لیے ان کے نام کی مخالفت کروں گا۔ اس کا تعلق پاکستان سے ہے۔ یہ قومی سلامتی کے لیے خطرہ ہوگا۔ وہ (پاکستان آرمی چیف) قمر جاوید باجوا اور پاکستان کے وزیر اعظم عمران خان کے دوست ہیں، اگر وہ اگلے وزیراعلیٰ کے طور پر منتخب ہوئے ہیں تو میں مخالفت کروں گا۔'

انہوں نے کہا کہ، 'اپنے ملک کی خاطر، میں پنجاب کے وزیراعلیٰ کے لیے ان کے (نوجوت سنگھ سدھو) نام کی مخالفت کروں گا۔ یہ قومی سلامتی کا معاملہ ہے۔ پاکستان کے وزیراعظم عمران خان ان کے دوست ہیں۔ سدھو کا تعلق آرمی چیف جنرل قمر جاوید باجوا سے ہے۔ یہ کانگریس پارٹی کا فیصلہ ہے، اگر وہ اسے (نوجوت سنگھ سدھو) پنجاب کا وزیراعلیٰ بناتے ہیں تو میں اس کی مخالفت کروں گا کیونکہ یہ قومی سلامتی کا مسئلہ ہے۔'

امریندر سنگھ نے ایک نجی چینل کے ساتھ گفتگو میں یہ دعویٰ بھی کیا کہ اگر سدھو کو وزیر اعلیٰ بنایا گیا تو وہ پنجاب کا بیڑا غرق کر دیں گے۔

انہوں نے یہ تبصرہ ایسے وقت کیا جب کانگریس لیجسلیچر پارٹی کا اجلاس چندی گڑھ میں منعقد ہورہا ہے۔ میٹنگ میں نئے لیڈر کے بارے میں فیصلہ ہونے کا امکان ہے۔ یہ پوچھے جانے پر کہ کیا سدھو انہیں وزیر اعلیٰ کے طور پر قبول کریں گے، تو امریندر سنگھ نے نا میں جواب دیا۔ انہوں نے پنجاب پردیش کانگریس کمیٹی کے صدر پر تنقید کرتے ہوئے کہا کہ، 'ایک وزارت تو چلا نہیں سکے، ریاست کیا چلائیں گے۔ سب برباد کر دیں گے، ان کی قوت نہیں ہے۔ پوری ریاست کا بیڑا غرق کردیں گے۔'