رام سنیہی گھاٹ کی مسجد پر بیان دے کر گھر گئے اویسی؟

ریاست اتر پردیش کے بارہ بنکی میں جمعرات کو رام سنیہی گھاٹ کی مسجد پر بیان دے کر کل ہند مجلس اتحاد المسلمین کے سربراہ اسد الدین اویسی مسلسل گھرتے جارہے ہیں۔ اس بیان کو لیکر ان پر مقدمہ تو ہوہی چکا ہے۔ اب ان کے تمام سیاسی مخالفین ان پر حملہ آور ہو گئے ہیں۔ تمام سیاسی پارٹیاں رام سنیہی گھاٹ کی مسجد کی پیروی کے بارے میں بتارہی ہیں اور ان سے سوال کررہی ہیں۔

بی جے پی کی دریاباد نشست سے رکن اسمبلی ستیش شرما نے اویسی کے اس بیان کو فرقہ وارانہ ہم آہنگی کو توڑنے والا بتایا اور کہا کہ وہ سماج کو گمراہ کررہے ہیں۔ وہیں سماجوادی پارٹی بھی اویسی کے دیے گیے بیان پر حملہ آور ہوگئی ہے اور کہا کہ اس مسجد کے لئے ہندو مسلمان سب نے کوشش کی۔

سماجوادی پارٹی کے ضلع صدر حافظ ایاز نے کہا کہ جہاں تک مسلمانوں کی بات ہے۔ ان کے لئے اکھلیش یادو کافی ہیں۔ اویسی یہاں کے مسلمانوں کی فکر نہیں کریں۔

اویسی کے اس بیان پر بی ایس پی بھی پیچھے نہیں ہے۔ بی ایس پی کے رہنما طارق قدوائی نے کہا کہ بی ایس پی نے اس مسئلے کی انتظامیہ سے لیکر ہائی کورٹ تک لڑائی لڑی، جہاں تک اے آئی ایم آئی ایم کا سوال ہے جس وقت مسجد شہید ہوئی اویسی اور ان کی پارٹی کہاں تھی؟ اویسی تب آتے ہیں جب انتخابات ہوتے ہیں۔

وہیں یوتھ کانگریس کے ضلع صدر سکندر عباس نے بھی اس مسئلے پر اویسی کو آئینہ دکھایا اور ان کے بیان کو انتخابی پروپیگنڈہ قرار دیا۔

واضح ہو کہ رام سنیہی گھاٹ تحصیل کے احاطے میں واقع مسجد کے معاملے میں تمام سیاسی اور سماجی تنظیموں نے اپنی اپنی سطح سے کوششیں کی تھیں، لیکن شاید اویسی اس سے باخبر نہیں تھے۔ یہی وجہ ہے کہ وہ مخالفین کی تنقید کا شکار ہورہے ہیں۔