ریل ملازمین کی سب سے بڑی یونین آل انڈیا ریل مینز فیڈریشن (اے آئی آر ایف) نے ریلوے کے وزیر پیوش گوئل سے مطالبہ کیا ہے کہ کووڈ کے بیچ آکسیجن سمیت اشیائے ضروری اور مسافروں کو ایک جگہ سے دوسری جگہ پہنچانے میں مصروف ریل ملازمین کو کورونا واریئر قرار دے کر ان کی موت ہونے پر 50 لاکھ روپے کا معاوضہ دیا جائے۔
اے آئی آر ایف کے جنرل سکریٹری شیو گوپال مشرا نے گذشتہ شام ریلوے کے وزیر کو ایک خط لکھ کر کہا تھا کہ ملک اس وقت کووڈ 19 کی دوسری لہر کے سبب مشکل دور سے گزر رہا ہے۔ایک لاکھ سے زیادہ ریلوے ملازمین کورونا وائرس سے متاثر ہوئے، جن میں سے 65 ہزار سے زیادہ افراد صحتیاب ہوکر اپنی ڈیوٹی پر واپس آ گئے ہیں۔تاہم ڈیڑھ ہزار سے زیادہ افراد اپنے فرائض کی انجام دہی کے دوران کورونا سے متاثر ہونے کی وجہ سے اپنی زندگی سے ہاتھ دھو بیٹھے ہیں۔