اجمیر: فقیر کی پٹائی معاملہ میں ملزمین کے خلاف سخت کاروائی کا مطالبہ

اجمیر کے چندروردائی نگر میں ایک فقیر کو شرپسندوں کی جانب سے تشدد کا نشانہ بنائے جانے کے خلاف پولیس کی نرم کارروائی پر اب سوالات اٹھنے لگے ہیں۔ اجمیر کی مسلم تنظیموں نے مذکورہ معاملہ کے خلاف آواز بلند کی تو پولیس کے اعلی افسران نے ملزمین کے خلاف مقدمہ درج کیا۔

ریاست راجستھان کے شہر اجمیر میں گذشتہ دنوں ایک فقیر کو شر پسندوں کی جانب سے زود و کوب کئے جانے کے معاملہ کے خلاف مقامی مسلم تنظیموں نے اپنی آواز بلند کی۔

دراصل جب یہ معاملہ سوشل میڈیا پر وائرل ہوگیا تو پولیس نے معمولی دفعات کے تحت مقدمہ درج کرتے ہوئے ملزمین کو گرفتار کیا۔ اس کے بعد انہیں ضما نت دے دی گئی۔

مگر مسلم تنظیموں کے نمائندوں نے مذکورہ معاملہ کو لے کر پولیس کے اعلی افسران سے ملاقات کی اور سخت کاروائی کا مطالبہ کیا۔ اس کے بعد پولیس نے مقدمہ درج کرتے ہوئے ملزمین کی تلاش شروع کردی ہے۔

مقامی تنظیموں کے عہدیداروں اور نمائندوں نے پولیس کے اعلی افسران سے ملاقات کر کے شرپسند لوگوں کے خلاف جبرا مارپیٹ کرنے، دھمکی دینے اور مذہبی جذبات بھڑکانے جیسے معاملات کے پیش نظر مقدمہ درج کر کے سخت سے سخت کارروائی کا مطالبہ کیا ہے۔

غور طلب ہے کہ کانپور کے رہنے والے متاثرین کا واردات کے بعد سے ہی کوئی پتہ نہیں ہے۔ فی الحال اجمیر رام گنج پولیس اسٹیشن میں شرپسندوں کے خلاف ایف آئی آر درج ہو چکی ہے اور پولیس نے تلاش شروع کر دی ہے۔