ہوائی کرایہ محدود رکھنے کی میعاد میں 31 مئی تک توسیع

وزارت شہری ہوا بازی کے نئے حکمنامے میں کہا گیا ہے کہ کرایہ کی موجودہ حد 31 مئی تک نافذ رہے گی۔

حکومت نے ہوائی کرائے کے لیے مقررہ زیادہ سے زیادہ اور کم سے کم حد کی میعاد 31 مئی تک بڑھا دی ہے۔ اس کے ساتھ ہی گھریلو پروازوں کی تعداد بھی 31 مئی تک گذشتہ سال کے 'سمر شیڈیول' کے 80 فیصد تک محدود رہے گی۔

کووڈ-19 کی موجودہ صورتحال کے پیش نظر شہری ہوا بازی کی وزارت نے دو الگ الگ احکامات جاری کر کے کرایہ اور پروازوں کی تعداد سے متعلق مخصوص ضوابط کی میعاد میں توسیع کرنے کا اعلان کیا ہے۔ ڈائریکٹوریٹ جنرل سول ایوی ایشن نے آج اس سلسلے میں سرکلر جاری کرکے یہ اطلاع دی ہے۔

کووڈ-19 کی وبا کے پیش نظر حکومت نے پرواز کے وقت کے حساب سے ہر شعبے کے لیے زیادہ سے زیادہ اور کم سے کم کرایہ طے کیا ہے۔

یہ نظام گذشتہ سال 25 مئی سے نافذ ہے جب دو ماہ کی مکمل تالا بندی کے بعد گھریلو راستوں پر باقاعدہ پروازیں شروع کرنے کی اجازت دی گئی تھی۔

تاہم ایندھن کی زیادہ قیمتوں کا حوالہ دیتے ہوئے اس سال زیادہ سے زیادہ اور کم سے کم کرایے میں اضافہ کیا گیا ہے۔

اس سسٹم کو پہلے تین ماہ کے لئے نافذ کیا گیا تھا، لیکن بعد میں اس کی مدت میں کئی بار توسیع کی جا چکی ہے۔ وزارت شہری ہوا بازی کے نئے حکم میں کہا گیا ہے کہ کرایہ کی موجودہ حد 31 مئی تک نافذ رہے گی۔

گذشتہ سال 25 مئی کو ایک تہائی پروازوں کی اجازت دینے کے بعد اس تعداد کو بتدریج بڑھا کر 80 فیصد کردیا گیا تھا۔

یو این آئی