آگرہ: تین کشمیری طلباء گرفتار، یوپی اقلیتی کمیشن نے گرفتاری کی حمایت کی

اترپردیش اقلیتی کمیشن کے چیئرمین اشفاق سیفی نے کہا کہ بھارت میں پاکستان کی حمایت میں جشن منانے کو ہرگز برداشت نہیں کیا جاسکتا ہے۔ اس معاملے میں جو بھی ملوث پایا جائے گا اس کے خلاف کاروائی کی جائے گی۔ پولیس ہر پہلو سے چھان بین کر رہی ہے۔

اترپردیش کے ضلع آگرہ کے راجا بلونت سنگھ انجینئرنگ کالج میں زیر تعلیم تین کشمیری طلبہ پر مقدمہ درج کر کے انہیں گرفتار کر لیا گیا ہے۔ ان طلباء پر یہ الزام ہے کہ بھارت اور پاکستان کے درمیان کھیلے گئے میچ میں پاکستان کے جیتنے پر انہوں جشن منایا تھا اور اسے سماجی رابطہ کی سائٹ پر بھی وائرل کیا۔ جس پر کاروائی کرتے ہوئے کالج انتظامیہ نے تینوں طالب علموں کا اخراج کردیا ہے اور بی جے پی رہنماؤں کی شکایت پر تھانہ جگدیش پور میں ایف ائی ار درج کر کے گرفتار کرلیا گیا ہے۔ ان سے پوچھ گچھ جاری ہے۔

ای ٹی وی بھارت سے بات کرتے ہوئے اترپردیش اقلیتی کمیشن کے چیئرمین اشفاق سیفی نے کہا کہ پولیس نے تین طالب علموں کو گرفتار کر لیا ہے اور ان پر ضروری کارروائی کی جا رہی ہے۔

انہوں نے کہا بھارت میں پاکستان کے حمایت میں جشن منانے کو ہرگز برداشت نہیں کیا جاسکتا ہے۔ اس معاملے میں جو بھی ملوث پایا جائے گا اس کے خلاف کاروائی کی جائے گی۔ پولیس ہر پہلو سے چھان بین کر رہی ہے۔

انہوں نے مزید کہا کہ ان طلباء سے کسی سازش کے تحت یہ کام کرایا گیا ہو اس کی بھی جانچ کی جارہی ہے ان کے رابطے میں کون لوگ ہیں اس پر بھی نظر رکھی جارہی ہے۔ ساتھ ہی ان کے موبائل اور لیپ ٹاپ کی بھی جانچ کی جائے گی۔


ای ٹی وی بھارت کے نمائندے نے سوال کیا کہ کیا کھیل کو کھیل کے نظریے سے نہیں دیکھنا چاہیے، ان طلباء کے مستقبل کو خراب کرنا کس حد تک درست ہے؟ اس سوال کے جواب میں انہوں نے کہا کہ جب بات ملک کے آتی ہے تو حب الوطنی کے جذبات کھیل پر غالب آجاتے ہے۔ انہوں نے کہا کہ ملک سب سے اوپر ہے۔ لہذا اس طرح کی حرکت ہر گز برداشت نہیں کی جاسکتی اس پر پولیس سختی سے کاروائی کر رہی ہے۔
مزید پڑھیں:

واضح رہے کہ سول انجینئرنگ تیسرے سال کے طالب علم ارشد یوسف، عنایت الطاف اور چوتھے سال کے طالب علم شوکت احمد غنائی کو گرفتار کر پوچھ گچھ کی جارہی ہے۔