انڈو تبتی آفتاب پوریوال امریکی شہر سنسناٹی کے میئر منتخب

پوریوال ایک مہاجر تبتی ماں اور بھارتی باپ کے بیٹے ہیں۔ ان کے دادا بریگیڈیئر اجیت سنگھ انڈین آرمی میں تھے۔

انڈو تبتی آفتاب پوریوال امریکی ریاست اوہائیو کے شہر سنسناٹی کے میئر منتخب ہو گئے ہیں۔ وہ کمیونٹی کے پہلے رکن ہیں جو اس طرح کے عہدے پر منتخب ہوئے ہیں۔ 38 سالہ پوریوال ایک مہاجر تبتی ماں اور بھارتی باپ کے بیٹے ہیں۔

انہوں نے میئر کے انتخاب میں اپنے حریف ڈیوڈ مین کو شکست دی۔ اپنی جیت کے بعد پوریوال نے کہا کہ 'میں الفاظ میں بیان نہیں کر سکتا کہ میں سنسناٹی کا اگلا میئر بننے کے لیے کتنا پرجوش ہوں۔ آج رات ہم نے تاریخ رقم کی۔'

انہوں نے گزشتہ سال امریکی ایوان نمائندگان میں جانے کی ناکام کوشش کی تھی۔

ڈیموکریٹک پارٹی سے وابستہ پوریوال نے پہلے ایک انٹرویو میں کہا تھا کہ ''میں ایک مہاجر کا بیٹا ہوں۔ میری والدہ تبت میں پیدا ہوئیں اور ہجرت پر مجبور ہوئیں۔''

انہوں نے بتایا کہ ان کی ماں میسور کے اسکول میں پڑھتی تھی اور کالج کی تعلیم کے لیے دہلی گئی تھی، جہاں ان کی ملاقات پنجاب کے رہنے والے ان کے والد سے ہوئی تھی۔

انہوں نے بتایا کہ 'میرے دادا (بریگیڈیئر اجیت سنگھ) انڈین آرمی میں تھے۔'

پوریوال نے بتایا کہ وہ 1982 میں اوہائیو میں پیدا ہوئے تھے اور وہ بچپن میں ایک بار تبت گئے تھے۔