Slab Collapsed in Hyderabad : కూలిన స్లాబ్​.. ఒకరు మృతి.. 9 మందికి తీవ్ర గాయాలు

One Person Died in Slab Collapse in Hyderabad : కూలీ పనికి వెళ్లిన కార్మికులకు విషాదం ఎదురైంది. నిర్మాణంలో తగిన నాణ్యత ప్రమాణాలు లేక స్లాబ్​ కూలిపోయింది. దీంతో పనికి వచ్చిన కూలీల్లో ఒకరు అక్కడికక్కడే మృతి చెందగా.. ఇద్దరి పరిస్థితి విషమంగా ఉంది. మరికొంత మందికి తీవ్ర గాయాలయ్యాయి. ఈ ఘటన హైదరాబాద్​లో జరిగింది. పోలీసులు తెలిపిన వివరాల ప్రకారం.. హైదరాబాద్​లోని పహాడి షరీఫ్​ పోలీస్​ స్టేషన్​ పరిధిలో తుక్కుగూడా(ఫ్యాబ్​ సిటీ) ప్రాంతంలో ప్రీమియర్​ ఎనర్జీస్​ సోలార్​ కంపెనీ అడ్మినిస్ట్రేషన్​ బ్లాక్​ను నిర్మిస్తోంది. మూడు రోజుల క్రితం స్లాబ్​ను వేశారు. అది కూలిపోవడంతో అక్కడ పని చేస్తున్న కూలీల్లో ఒకరు అక్కడికక్కడే మృతి చెందారు. 9 మందికి తీవ్ర గాయాలయ్యాయి. ఇద్దరి పరిస్థితి విషమంగా ఉంది. 

ప్రమాద సమయంలో దాదాపు ఆ ప్రాంతంలో 25 మంది కార్మికులు పని చేస్తున్నారు. ఈ విషయంపై కేసు నమోదు చేసుకుని దర్యాప్తు చేస్తున్నట్లు మహేశ్వరం ఏసీపీ అంజయ్య తెలిపారు. ప్రీమియర్​ ఎనర్జీస్​ కంపెనీ యాజమాన్యం నిర్లక్ష్యం వల్లే ప్రమాదం జరిగిందని స్థానికులు, కార్మిక సంఘ నాయకులు ఆరోపిస్తున్నారు. స్లాబ్​ కూలిపోడానికి సరైన కారణాలు విచారణలో తెలుస్తాయని పోలీసులు తెలిపారు.