తెలంగాణలోని వరంగల్ జిల్లా మామునూరు విమానాశ్రయం నుంచి త్వరలో 19 సీట్ల చిన్న విమానాల (Short Flights)ను నడిపించేందుకు రంగం సిద్ధమవుతోంది. ప్రయోగాత్మకంగా దీనిని ప్రారంభించి, విస్తరించేందుకు, క్రమం తప్పకుండా నిర్వహించేందుకు కేంద్ర ప్రభుత్వం నిర్ణయించింది. ఇందుకు అవసరమైన సన్నాహాలు చేయాలని రాష్ట్ర ప్రభుత్వానికి తాజాగా కేంద్ర పౌరవిమానయాన శాఖ లేఖ రాసింది. త్వరలో కేంద్ర, రాష్ట్ర ప్రభుత్వ అధికారులతో ఉన్నతస్థాయి సమావేశం జరగనుంది. తర్వాత వరంగల్ నుంచి వైమానిక సేవల ప్రారంభ తేదీ అధికారికంగా వెల్లడి కానుంది. ఇటీవల కేంద్ర పౌరవిమానయాన శాఖ మంత్రి జ్యోతిరాదిత్య సింధియా హైదరాబాద్‌కు వచ్చినపుడు సీఎం కేసీఆర్‌తో భేటీ అయ్యారు. ముఖ్యమంత్రి వినతి మేరకు వరంగల్ నుంచి త్వరలో చిన్న విమానాల (Short Flights) సేవలను ప్రారంభిస్తామని, బసంత్‌నగర్‌, కొత్తగూడెం, దేవరకద్రలకు సైతం వాటిని విస్తరిస్తామని, ఆదిలాబాద్‌లోని విమానాశ్రయాన్ని వాయుసేన ద్వారా నడిపిస్తామని సింధియా హామీ ఇచ్చారు. దిల్లీలో తమ శాఖ సమీక్ష సమావేశంలో వరంగల్‌లో వైమానిక సేవలకు నిర్ణయించినట్లు తెలిసింది.
తొలుత 29 సీట్ల విమానాలు
చిన్న విమానాశ్రయాల్లో నడిపేందుకు వీలుగా హిందుస్థాన్‌ ఎరోనాటిక్స్‌ లిమిటెడ్‌(Hindustan Aeronautics Limited) సంస్థ సివిల్‌ డార్నియర్‌ 228 (Civil Dornier 228) విమానాలను తయారు చేస్తోంది. వీటిని కొని నిర్వహించేందుకు పౌరవిమానయాన శాఖ, హెచ్‌ఏఎల్‌(Hindustan Aeronautics Limited) ల మధ్య ఇటీవల ఒప్పందం కుదిరింది. 19 సీట్లతో తక్కువ రన్‌వేతో టేకాఫ్‌, ల్యాండ్‌ అయ్యేలా ఇవి సిద్ధమవుతున్నాయి. వీటి నిర్వహణ వ్యయం తక్కువ. తొలుత అరుణాచల్‌ప్రదేశ్‌ నుంచి ప్రారంభించి, తర్వాత ద్వితీయ శ్రేణి నగరాలకు, జిల్లాలకు వీటిని విస్తరించాలని కేంద్రం భావిస్తోంది.