పాకాలను ముద్దాడిన గోదావరి జలాలు..!

పాకాల ఏళ్లనాటి కల నేడు సాకారమైంది. గోదారమ్మ పాకాల చెరువును ముద్దాడిన తరుణం ఆవిష్కృతమైంది. స్థానిక ఎమ్మెల్యే పెద్ది సుదర్శన్ రెడ్డి పూలు చల్లి గోదారమ్మకు స్వాగతం పలికారు. ఈ శుభ తరుణాన్ని చూసి అన్నదాతలు ఆనందం వ్యక్తం చేస్తున్నారు.

ఎన్నో ఏళ్లుగా ఎదురు చూస్తున్న పాకాల ఆయకట్టు రైతుల కల నేడు సాకారమైంది. తెరాస ప్రభుత్వం, నర్సంపేట ఎమ్మెల్యే పెద్ది సుదర్శన్ రెడ్డి కృషితో గోదావరి జలాలు పాకాల సరస్సును ముద్దాడాయి. ఈ సందర్భంగా వరంగల్ రూరల్ జిల్లా దబ్బవాగు బ్రిడ్జి దగ్గర గోదావరి జలాలకు ఎమ్మెల్యే సంతోషంతో పూలు చల్లారు.

పాకాల సరస్సు కింద ఖానాపురం, చెన్నారావుపేట, నర్సంపేట మండల పరిధిల్లో దాదాపు 30,000 ఎకరాల్లో వరి సాగు అవుతోంది. పూర్తిస్థాయిలో చెరువు నిండినా రెండో పంటకు మాత్రం రొటేషన్ పద్ధతిలోనే నీరు విడుదల చేసేవారు. ఈ క్రమంలో కొంతమంది రైతులు రెండో పంట సాగుచేసినా చివరి దశలో నీటి ఎద్దడి ఏర్పడేదని రైతులు తెలిపారు.

ఇకపై రెండు పంటలు

తెరాస ప్రభుత్వం వచ్చాక పెద్ది గోదావరి జలాలను పాకాలకు మళ్లించాలని కోరినట్లు ఎమ్మెల్యే పెద్ది సుదర్శన్ రెడ్డి తెలిపారు. దేవాదుల ఎత్తిపోతల పథకం ద్వారా నీటిని తీసుకొచ్చారు. దేవాదుల నుంచి రామప్ప, పాకాల సరస్సుకు నీరు ప్రవహిస్తోంది. ఇకపై రెండు పంటలు సాగుచేయొచ్చని అన్నదాతలు ఆనందం వ్యక్తం చేస్తున్నారు. ఈ సందర్భంగా రాష్ట్ర ప్రభుత్వానికి, ఎమ్మెల్యే పెద్ది సుదర్శన్ రెడ్డికి ధన్యవాదాలు తెలియజేశారు.

ఇదీ చదవండి:తెలంగాణలో మూడురోజుల పాటు తేలికపాటి జల్లులు