హైదరాబాద్​లో మరిన్ని ఠాణాలు.. పెరగనున్న పోలీస్ నిఘా..!

New Police Stations In Hyd: నేరాలు జ‌ర‌గ‌కుండా చూడ‌టంలో, నేరస్థుల‌కు శిక్ష‌లు విధించ‌డంలో పోలీసు స్టేష‌న్లు కీలక పాత్ర పోషిస్తాయి. పోలీసు సిబ్బంది, స్టేష‌న్లు ప్ర‌జ‌ల‌కు ఎంత అందుబాటులో ఉంటే అంత మేలు. ఎందుకంటే నేర నియంత్ర‌ణ‌, శాంతి భ‌ద్ర‌త‌లు కాపాడ‌టం వంటికి మ‌రింత సుల‌భ‌మవుతుంది. ఆ దిశ‌గానే రాష్ట్ర ప్ర‌భుత్వం అడుగులు వేస్తోంది. రాజ‌ధాని న‌గ‌రంలోని మూడు క‌మిష‌న‌రేట్ల ప‌రిధిలో నూత‌న పోలీసు స్టేష‌న్ల ఏర్పాటుకు శ్రీ‌కారం చుట్టింది.

New Police Stations In Hyderabad: స‌మాజంలో శాంతి భ‌ద్ర‌త‌లు కాపాడటంలో, ప్ర‌శాంత వాతావ‌ర‌ణం క‌ల్పించడంలో పోలీసు వ్య‌వ‌స్థ పాత్ర ప్ర‌ధాన పాత్ర పోషిస్తుంది. కేవ‌లం ముఖ్యమైన సంద‌ర్భాల్లోనే కాకుండా.. సామాన్య ప్ర‌జ‌లు రోజూ ప్ర‌శాంతంగా నిద్ర పోవాల‌న్నా దాని వెనుక పోలీసుల కృషి ఎంతో ఉంటుంది. నేర‌లు నియంత్రించ‌డం, నేర‌స్థుల‌కు శిక్ష‌లు ప‌డ‌టం, తిరిగి అలాంటికి జ‌ర‌గ‌కుండా కాపాడుతుంటారు.

ముఖ్యంగా కోటికి పైగా జ‌నాభా నివ‌సించే మ‌న రాజ‌ధాని న‌గ‌రం హైద‌రాబాద్​లో శాంతి భ‌ధ్ర‌త‌లు కాపాడ‌టం క‌త్తి మీద సాము లాంటిదే. ఇందుకు అవ‌స‌రమైన స్టేష‌న్లు, సిబ్బంది ఉండాలి. ఇప్ప‌టికే న‌గ‌రంలోని మూడు కమిష‌న‌రేట్ల ప‌రిధిలో బ‌ల‌మైన పోలీసు వ్య‌వ‌స్థ ఉన్న‌ప్ప‌టికీ దాన్ని మ‌రింత బ‌లోపేతం చేసే దిశ‌గా రాష్ట్ర ప్ర‌భుత్వం అడుగులు వేసింది. దీనికోసం మ‌రిన్ని నూత‌న పోలీస్ స్టేష‌న్లు ఏర్పాటు చేసింది. ఇందులో లా అండ్ ఆర్డ‌ర్‌, ట్రాఫిక్ పోలీసు స్టేష‌న్ల‌తో పాటు మ‌హిళా పీఎస్‌ల‌కు కూడా ఉండ‌టం విశేషం.

హైదరాబాద్‌ కమిషనరేట్ పరిధిలో కొత్తగా ఏర్పాటైన డివిజన్లు, జోన్లు, ఠాణాలకు ఉన్నతాధికారులు హద్దును నిర్ణయించారు. అక్క‌డి నుంచే కార్యకలాపాలు నిర్వహించేందుకు త‌గిన ఏర్పాట్లు చేస్తున్నారు. ఇందుకోసం భవనాలను పరిశీస్తున్నారు. కొన్నింటికి హద్దులు సైతం ఖరారు చేసినట్లు తెలుస్తోంది. కొత్తగా 13 లా అండ్ ఆర్డర్, ప్రస్తుతం ఉన్న బేగంపేటతో పాటు.. కొత్తగా 5 మహిళా పోలీస్​ స్టేషన్లు ఏర్పాటు చేశారు. అన్ని మహిళా పోలీస్ స్టేషన్లలో ప్రత్యేకంగా ఉమెన్ సేప్టీ వింగ్ జోన్ ఉండేలా చ‌ర్య‌లు తీసుకున్నారు. మొత్తం 8 జోన్లు వాటి హద్దులు, ఠాణాలు, ఏసీపీ డివిజన్ల సర్దుబాటు ప్ర‌క్రియ పూర్తిచేశారు.

జోన్ల ప‌రంగా వివ‌రాలు:

1.సెంట్రల్‌ జోన్: అబిడ్స్ రోడ్‌, నాంపల్లి పోలీస్ స్టేషన్లను అబిడ్స్ ఏసీపీ డివిజన్​గా ఏర్పాటు చేశారు. చిక్కడపల్లి, ముషీరాబాద్ పీఎస్​లు క‌లిపి చిక్కడపల్లి డివిజన్​​గా ఏర్పాటైంది. పాత గాంధీనగర్ పోలీస్ స్టేషన్, లేక్ పీఎస్​లు.. కొత్తగా ఏర్పాటైన దోమల్‌గూడ ఠాణాల‌ను గాంధీనగర్‌ కొత్త డివిజన్​లో కలిపారు. పాత సైఫాబాద్ ఠాణా, కొత్తగా ఏర్పడ్డ ఖైరతాబాద్ స్టేష‌న్ల‌ను సైఫాబాద్ ఏసీపీ డివిజ‌న్​లో విలీనం చేశారు.

2.ఈస్ట్ జోన్ (తూర్పు మండ‌లం): ప్రస్తుతం ఉన్న అంబర్‌ పేట, కాచిగూడ పీఎస్​ల‌ను కాచిగూడ డివిజన్​లో ఉంచారు. లాలాగూడ, చిలకలగూడతో పాటు కొత్త‌గా ఏర్ప‌డ్డ వారాసిగూడ ఠాణాలు ఇక నుంచి చిలకలగూడ డివిజన్​లో పనిచేయనున్నాయి. ఓయూ, నల్లకుంట పీఎస్​లు కొత్తగా ఏర్ప‌డ్డ ఉస్మానియా యూనివర్సిటీ ఏసీపీ డివిజన్​లో క‌లిపారు. అప్జల్ గంజ్‌, సుల్తాన్‌ బజార్‌, నారాయణ గూడ స్టేష‌న్ల‌ను సుల్తాన్‌ బజార్ డివిజన్​లోనే ఉంచారు.

3.నార్త్ జోన్ (ఉత్త‌ర మండ‌లం): బేగంపేట, బోయినపల్లి, కొత్తగా ఏర్పాటైన తాడ్‌ బండ్ పీఎస్​ల‌ను బేగంపేట్ ఏసీపీ డివిజన్​లో ఉంచారు. గోపాలపురం, తుకారాంగేట్‌, మారేడ్‌ పల్లి ఠాణాలను గతంలో ఉన్న గోపాలపురం ఏసీపీ డివిజన్‌లోనే కొనసాగిస్తున్నారు. రాంగోపాల్‌ పేట్, మహంకాళి, మార్కెట్ ఠాణాల‌ను సైతం పాత డివిజన్‌ అయిన మహంకాళిలోనే ఉంచారు. బొల్లారం, తిరుమలగిరి, కార్ఖానా పోలీస్​ స్టేషన్లను కొత్తగా ఏర్పాటైన తిరుమలగిరి ఏసీపీ డివిజన్​లో కలిపారు.

4. సౌత్ జోన్ (ద‌క్షిణ మండ‌లం) : చార్మినార్‌, కామటిపురా, హుస్సేనిఆలం స్టేష‌న్ల‌ను చార్మినార్ ఏసీపీ డివిజన్‌ లో ఉంచారు. ఫలక నుమా, బహదూర్‌ పురా, కాలాపత్తర్ పీఎస్‌ లను పాత ఫలక్ నుమా డివిజన్‌ లోనే కొన‌సాగిస్తున్నారు. మొఘల్‌ పురా, ఛత్రినాకా, శాలిబండ స్టేష‌న్ల‌ను కొత్తగా ఏర్పాటైన ఛత్రినాకా డివిజన్ కి మ‌ర్చారు. మీర్‌ చౌక్‌, భవాని నగర్, రీన్‌ బజార్ పీఎస్‌ లను మీర్‌ చౌక్‌ లోనే ఉంచారు.

5. వెస్ట్ జోన్ (ప‌శ్చిమ మండ‌లం): బంజారాహిల్స్‌, కొత్తగా ఏర్ప‌డ్డ మాసబ్‌ ట్యాంక్ స్టేష‌న్ల‌ను ప్రస్తుతం ఉన్న బంజారాహిల్స్ ఏసీపీ పరిధిలోనే ఉంచారు. జూబ్లీహిల్స్‌, ఫిలిం నగర్ కొత్త స్టేష‌న్ల‌ను నూతనంగా ఏర్పటైన జూబ్లీహిల్స్‌ డివిజన్ లో కలిపారు. పంజాగుట్ట, కొత్త స్టేష‌న్ రెహ్‌మత్ నగర్ లను పాత పంజాగుట్ట ఏసీపీ డివిజన్ లో ఉంచారు. ఎస్‌.ఆర్‌.నగర్, బోరబండ కొత్త ఠాణను కొత్త ఎస్‌ఆర్‌ నగర్ డివిజన్‌ లో కలిపారు.

6. సౌత్ ఈస్ట్ (ఆగ్నేయ మండలం): బండ్లగూడ కొత్త ఠాణా, కంచన్ బాగ్‌, చంద్రాయ‌న్ గుట్ట స్టేష‌న్ల‌ను కొత్తగా ఏర్పాటు చేసిన చంద్రాయణ్‌ గుట్ట డివిజన్‌ లో కలిపారు. సంతోష్‌ నగర్, మాదన్న పేట, సైదాబాద్ ఠాణాల‌ను కొత్తగా ఏర్పాటైన సైదాబాద్ డివిజన్ లో కలిపారు. మలక్‌ పేట, చాద‌ర్ ఘాట్‌, డబీర్‌ పురా పీఎస్ ల‌ను మలక్‌ పేట డివిజన్ లో ఉంచారు.

7. సౌల్ వెస్ట్ (నైరుతి మండలం): ఆసిఫ్‌ నగర్, హుమాయున్‌ నగర్, హబీబ్‌ నగర్ పీఎస్​ల‌ను ఆసిఫ్‌ నగర్ డివిజన్​లోనే ఉంచారు. బేగం బజార్‌, షాహినాయత్‌ గంజ్‌, మంగళ్ హాట్​లను గోషామహల్ ఏసీపీ డివిజన్​లో కలిపారు. కొత్తగా ఏర్పడ్డ టోలిచౌకి, గోల్కొండ, లంగర్‌ హౌస్‌ ఠాణాలను కొత్తగా ఏర్ప‌డ్డ గోల్కొండ డివిజన్​లో విలీనం చేశారు. కొత్తగా ఏర్పాటైన గుడి మల్కాపూర్‌, కుల్సుంపురా, టపాచబుత్ర పీఎస్​లను కొత్తగా ఏర్పాటు చేసిన కుల్సుంపురా డివిజన్​లో కలిపారు.

ప్రస్తుతం ఉన్న మహిళా పోలీస్‌ స్టేషన్లతో పాటు కొత్తగా జోన్​కు ఒక మహిళా పోలీస్​ స్టేషన్​ను ఏర్పాటు చేసి అన్ని వీట‌న్నింటినీ ఉమెన్‌ సేప్టీ వింగ్‌ విభాగం జోన్‌ కు అనుసంధానం చేశారు. ప్రస్తుతం ఉన్న ట్రాఫిక్ జోన్లతో పాటు కొత్తగా ట్రాఫిక్ డీసీపీ-3 ఏర్పాటు చేశారు.