రజనీకాంత్ వీడియోతో అశ్విన్ క్రికెట్ కోచింగ్!

టీమిండియా స్టార్​ బౌలర్​ రవిచంద్రన్​ అశ్విన్​... రజనీకాంత్​ సినిమాలోని ఓ యాక్షన్​ వీడియో సీన్​ను పోస్ట్​ చేశాడు. అది చూసిన నెటిజన్లు విపరీతంగా పడి నవ్వుతున్నారు. ఈ వీడియో ప్రస్తుతం వైరల్​గా మారింది.

కరోనా లాక్‌డౌన్ నేపథ్యంలో ఇంట్లోనే గడుపుతున్న పలువురు క్రీడాకారులు వినోదకరమైన వీడియోలను పోస్టు​ చేస్తూ అభిమానుల చేత కడుపుబ్బా నవ్విస్తున్నారు. సామాజిక మాధ్యమాల్లో ఎప్పడు చురుగ్గా ఉండే టీమిండియా స్టార్ బౌలర్ రవిచంద్రన్ అశ్విన్ తాజాగా పోస్టు చేసిన ఓ వీడియో ప్రస్తుతం అభిమానుల చేత పొట్ట చెక్కలయ్యేలా నవ్విస్తోంది.

సూపర్ స్టార్ రజనీకాంత్ సినిమాలోని ఓ ఫైటింగ్ సీన్ వీడియోను పోస్టు చేశాడు అశ్విన్​. అందులో విలన్లు రజనీకాంత్‌పై బాంబులు విసురుతుంటారు. వాటిని సాహసోపేతంగా గాల్లో ఎగిరి ఫీట్లు చేస్తూ ఒడుపుగా పట్టుకుని తిరిగి వారిపైకే విసురుతుంటాడు రజనీ. ఆన్‌లైన్ కోచింగ్ అలెర్ట్ అన్న అశ్విన్.. ఇంటి వద్ద అందరూ ఈ ఫీల్డింగ్ డ్రిల్స్‌ను ప్రాక్టీస్ చేయాలని కోరాడు. అయితే, చిన్న షరతు కూడా పెట్టాడు. బాంబులతో కాకుండా సాఫ్ట్ బాల్స్‌తో మాత్రమే ప్రాక్టీస్ చేయాలని సూచించాడు. ఇది చూసిన అభిమానులు ఇలాంటివే మరిన్ని వీడియోలు పోస్టు చేసి అదిరే కామెంట్లు చేస్తున్నారు.