'టీమ్ఇండియా తరఫున అత్యధిక వికెట్లు నా కల'

టీమ్ఇండియా తరఫున అత్యధిక వికెట్లు సాధించాలన్నదే తన కల అని అంటున్నాడు పేసర్ మహ్మద్ సిరాజ్. అందుకోసం చాలా శ్రమిస్తున్నానని తెలిపాడు.

ఆస్ట్రేలియా పర్యటనలో సత్తాచాటి గుర్తింపు తెచ్చుకున్నాడు టీమ్ఇండియా పేసర్ మహ్మద్ సిరాజ్. ప్రస్తుతం ఐపీఎల్ కోసం సిద్ధమవుతున్నాడు. రాయల్ ఛాలెంజర్స్ బెంగళూరు జట్టుకు ఆడుతున్న ఇతడు ప్రాక్టీస్​లో మునిగిపోయాడు. తాజాగా ఓ ఇంటర్వ్యూలో 'మీ లక్ష్యమేంటి?' అన్న ప్రశ్నకు ఆసక్తికర సమాధానం చెప్పాడు.

"నేను బౌలింగ్ చేస్తున్నపుడు బుమ్రా నాకు మద్దతుగా నిలిచేవాడు. నీవు ఎలా వేయగలవో అలాగే వేయమని.. అదనంగా ఏమీ చేయొద్దని చెప్పేవాడు. అంతటి అనుభవం గల బౌలర్​ నుంచి నేర్చుకోవడం గొప్పగా అనిపిస్తుంది. నేను ఇషాంత్ శర్మతో కూడా ఆడాను. అతడు 100 టెస్టులు ఆడాడు. అతడితో డ్రెస్సింగ్ రూమ్ పంచుకోవడం సంతోషం. టీమ్ఇండియా తరఫున అత్యధిక వికెట్లు సాధించిన బౌలర్​గా నిలవాలన్నదే నా కల."

-సిరాజ్, టీమ్ఇండియా బౌలర్

ఆస్ట్రేలియా పర్యటనలో టెస్టు అరంగేట్రం చేసిన సిరాజ్ అద్భుత ప్రదర్శనతో ఆకట్టుకున్నాడు. గబ్బా టెస్టులో ఐదు వికెట్లు తీసి టీమ్ఇండియా గెలుపులో కీలకపాత్ర పోషించాడు. ఈ పర్యటన సమయంలోనే తన తండ్రిని కోల్పోయాడీ బౌలర్. కానీ జట్టు కోసం అక్కడే ఉండిపోయాడు. ఈ విషయంపైనా స్పందించాడు సిరాజ్.

"ఆస్ట్రేలియా పర్యటనలో క్వారంటైన్​లో ఉన్న సమయంలో తండ్రి చనిపోయారన్న వార్త వచ్చింది. దురదృష్టవశాత్తు ఆ సమయంలో నా గదికి ఎవరూ రాలేదు. నేను మా అమ్మ, ప్రేయసికి ఫోన్ చేశా. ఆ సమయంలో మా అమ్మ నాకు చాలా మద్దతుగా నిలిచారు. 'తండ్రి కల నెరవేర్చే బాధ్యత నీకుంది' అని చెప్పారు" అంటూ వెల్లడించాడు సిరాజ్.